İstirahət günlərində Bakının çimərliklərində istirahət edənlərin sayının kəskin artması ilə əlaqədar paytaxtın Mənzil-Kommunal Təsərrüfatı Departamenti sahil zonalarında təcili təmizlik tədbirləri həyata keçirir.
Departamentdən verilən məlumata görə, çimərliklərdə tullantı konteynerlərinin sayı artırılıb, məişət tullantıları üçün yeni meydançalar yaradılıb.
Bildirilib ki, təmizlik briqadaları gücləndirilmiş iş rejiminə keçib və bütün çimərlik ərazilərində fasiləsiz fəaliyyət göstərirlər. Eyni zamanda vətəndaşlar arasında maarifləndirmə işləri aparılır — istirahət edənlərə atılmış tullantıların insan sağlamlığına və ətraf mühitə vurduğu zərərlər izah olunur.
Mənzil-Kommunal Təsərrüfatı Departamenti bir daha sakinlərə müraciət edərək tullantıları yalnız bunun üçün ayrılmış xüsusi yerlərə atmağa çağırır.
