Britaniyalı məşhur musiqiçi, Black Sabbath qrupunun vokalisti və həmtəsisçisi Ozzy Osbourne 76 yaşında vəfat edib.
Mənbə: Sky News ailəsinin rəsmi bəyanatına istinadən xəbər verir: “Sözlərlə ifadə etmək çətin olan bir kədərlə bildiririk ki, sevimli Ozzy Osbourne bu səhər ailəsinin əhatəsində, sevgi ilə dünyasını dəyişdi.”
Son səhnə çıxışı və sağlamlıq durumu
Yalnız üç həftə əvvəl Osbourne doğma Birmingemdəki Villa Park stadionunda vida konserti ilə son dəfə səhnəyə çıxmışdı. Taxtda oturaraq çıxış etmiş, amma emosional şəkildə pərəstişkarlarına təşəkkür etmişdi: “Nə hiss etdiyimi təsəvvür belə edə bilməzsiniz – sizə bütün qəlbimlə təşəkkür edirəm.”
Son illərdə Osbournenin sağlamlıq durumu ciddi şəkildə pisləşmişdi. Onda Parkinson xəstəliyi aşkarlanmış, üstəlik 2019-cu ildəki yıxılmadan sonra fəsadlar başlamışdı. Bir çox turnesini ləğv etsə də, 2022-ci ildə Birmingemdə təşkil olunan Birlik Oyunlarının bağlanış mərasimində səhnəyə çıxmışdı.
Kim idi Ozzy Osbourne?
- Black Sabbath qrupunun qurucularından olan Osbourne, 1970-ci illərdə heavy metal janrının əsasını qoyan simalardan biri idi.
- Onun ifa etdiyi məşhur mahnılar arasında “Iron Man”, “Paranoid”, “War Pigs”, “Crazy Train” və “Changes” yer alır.
- 2000-ci illərdə ailəsi ilə birgə çəkildiyi “The Osbournes” realiti-şousu MTV-də fenomenə çevrilmişdi.
- Alkoqol və narkotiklərlə bağlı qalmaqallar, eləcə də səhnədə yarasa başını dişləməsi kimi hadisələrlə tabloidlərin başlıqlarında tez-tez görünmüşdü.
Mükafatlar və irsi
- Rock and Roll Hall of Fame-ə iki dəfə – həm qrup üzvü, həm də solo artist kimi daxil edilib.
- Hollywood və Birmingemdə ulduzlara sahibdir.
- Beş “Grammy” mükafatı və Classic Rock tərəfindən verilən “Living Legend”, NME-nin “Godlike Genius” mükafatları ilə təltif olunub.
Osbournenin arxasında həyat yoldaşı Şaron, övladları Amy, Kelly, Jack, eləcə də ilk evliliyindən olan Jessica və Louis qaldı.
