Bakı Şəhər Halqası Əməliyyat Şirkətinin baş direktoru Maqsud Fərzullayev açıqlamasında 2025-ci ildə keçiriləcək “Formula 1” Azərbaycan Qran-prisinin əvvəlkilərdən daha böyük və təsirli olacağını bildirib. O, azarkeşləri həm həyəcanlı yarış, həm də Azərbaycanın qonaqpərvərliyindən zövq almağa dəvət edib.
Fərzullayevin sözlərinə görə, ötən il rekord tamaşaçı sayı ilə yadda qalıb və qlobal marağın artması ilə Azərbaycan Qran-prisi artıq “Formula 1” təqvimində mütləq izlənilməsi lazım olan yarışlardan birinə çevrilib. 2025-ci ildə tədbirin möhtəşəmliyini artıracaq ən önəmli amillərdən biri iki yeni tribunadır ki, bu da tədbirin rekord səviyyədə tamaşaçı tutumuna malik olmasını təmin edəcək. Həmçinin, ilk dəfə olaraq eksklüziv “Formula 1 Çempionlar Klubu” fəaliyyətə başlayacaq, burada pit-leyn mənzərələri, paddok turları və digər unikal təcrübələr təqdim olunacaq.
Baş direktorun məlumatına görə, dünyanın ən güclü pilotları yenidən Bakıya qayıdacaq və azarkeşləri unudulmaz anlar gözləyir. Müsbət sürprizlər sırasında sentyabrın 19-da DJ Anyma, 20-də isə Martin Garrix və Glass Animals kimi dünya ulduzlarının möhtəşəm konsertləri yer almaqdadır.
