ABŞ-ın rəsmi strukturlarında kibertəhlükəsizliklə bağlı son illərin ən ciddi insidentlərindən biri qeydə alınıb. Reuters agentliyinin məlumatına görə, təhlükəsiz korporativ yazışmalar üçün nəzərdə tutulan TeleMessage platformasına qarşı həyata keçirilmiş haker hücumu nəticəsində ABŞ Prezidentinin milli təhlükəsizlik üzrə köməkçisi Mayk Uolts da daxil olmaqla 60-a yaxın yüksək vəzifəli şəxsin məlumatları sızdırılıb.
Konfidensial yazışmalar ələ keçdi
Sızan məlumatlar arasında ABŞ Gömrük Xidməti, ABŞ Gizli Xidməti və hətta Ağ Evin bir əməkdaşı ilə bağlı yazışmalar da var. Jurnalistlər tərəfindən aparılan araşdırma zamanı üzə çıxıb ki, 4 may tarixinə aid olan bu yazışmaların təxminən yarısı real şəxslərə məxsus telefon nömrələri ilə üst-üstə düşür. Məlumatlar içərisində açıq-aşkar məxfi sənədlərə rast gəlinməsə də, təhlükə səviyyəsi yüksək qiymətləndirilir.
ABŞ rəsmilərinin səfər planları ifşa olunub
Ən böyük narahatlıq doğuran məqam ondan ibarətdir ki, sızdırılmış bəzi mesajlarda yüksək rütbəli ABŞ rəsmilərinin xarici səfərlərinə dair koordinasiya və planlaşdırma detalları yer alıb. Xüsusilə “POTUS (ABŞ Prezidenti), Roma – Vatikan, hökumət mətbuat xidməti” başlıqlı bir çatda ABŞ nümayəndə heyətinin Vatikan səfəri müzakirə olunub. Digər yazışmalarda isə İordaniyaya planlaşdırılan səfərlə bağlı məqamlar diqqət çəkib.
Maliyyə sektoru da zərər görüb
Sızma nəticəsində zərər çəkmiş təşkilatlar arasında bir neçə iri maliyyə qurumu da var. Onların nümayəndələri baş vermiş insidenti təsdiqləyib və yazışmaların orijinallığını qəbul ediblər. Ağ Evdən verilən açıqlamada qeyd olunub ki, məsələ “Smarsh” şirkətinin (TeleMessage-in sahibi) təhlükəsizlik insidenti kimi qeydə alınıb, lakin rəsmi qurumlar bu servisin istifadəsi barədə əlavə açıqlama verməkdən imtina ediblər.
TeleMessage kimdir və nə ilə məşğuldur?
TeleMessage — təhlükəsiz mobil ünsiyyət sahəsində fəaliyyət göstərən texnologiya şirkətidir. Müxtəlif tətbiqlərdən, o cümlədən WhatsApp və Signal-dan gələn konfidensial mesajların qorunmasını və saxlanmasını təmin edir. Şirkətin xidmətləri maliyyə sektorunda, dövlət qurumlarında və səhiyyə sistemində geniş istifadə olunur. Hücumdan sonra, 5 may tarixində platformanın fəaliyyəti təhlükəsizlik məqsədilə dayandırılıb.
