Asiya İnkişaf Bankı (AİB) Xəzəryanı regionda su təchizatı və şəhər infrastrukturunun inkişafı istiqamətində iri maliyyə dəstəyi ayırıb. Qurumun açıqlamasına görə, bu məqsədlə ümumilikdə 3,5 milyard ABŞ dolları həcmində vəsait nəzərdə tutulub və Azərbaycan da bu proqramın əsas iştirakçıları sırasındadır.
AİB-in Su və Şəhər İnkişafı sektorunun baş direktoru Norio Saito Ümumdünya Şəhərsalma Forumu (WUF13) çərçivəsində çıxışı zamanı bildirib ki, bank hazırda Azərbaycanla yeni layihələr üzərində danışıqlar aparır.
Onun sözlərinə görə, bu təşəbbüslər iqlim dəyişikliyinə uyğunlaşma və dayanıqlı şəhər mühitinin formalaşdırılması baxımından xüsusi əhəmiyyət daşıyır.
Bakı üçün yeni su mənbələri və təmizləmə sistemləri
Norio Saito qeyd edib ki, AİB Bakının su təchizatı sisteminin daha effektiv və itkisiz fəaliyyət göstərməsi üçün konkret layihələr hazırlayır:
“Biz paytaxtın minimum itki ilə su təminatını yaxşılaşdıracaq sistem üzərində işləyirik. Bu çərçivədə yeni su mənbələrinin yaradılması mümkün olacaq. Layihə kənd təsərrüfatı və digər sahələr üçün də əlavə imkanlar açacaq”.
Bundan əlavə, bank çirkab sularının təmizlənməsi sahəsində də dəstəyini genişləndirməyi planlaşdırır. Yeni qurğuların tikilməsi və mövcud sistemlərin modernləşdirilməsi su resurslarının daha səmərəli idarə olunmasına xidmət edəcək.
Regional yanaşma və iqlim çağırışları
AİB rəsmisi vurğulayıb ki, ayrılan 3,5 milyard dollarlıq maliyyə paketi təkcə Azərbaycana deyil, ümumilikdə Xəzər hövzəsinə daxil olan ölkələrə yönəlib.
Bu vəsait iqlim dəyişikliyinin təsirlərinə qarşı dayanıqlılığın artırılması, şəhər infrastrukturlarının yenilənməsi və su təhlükəsizliyinin təmin edilməsi məqsədi daşıyır.
