Məşhur Hollivud aktyoru Alek Bolduin kino sənayesindən uzaqlaşmaq qərarına yaxın olduğunu açıqlayıb. 68 yaşlı aktyor son müsahibəsində bildirib ki, artıq əvvəlki kimi film çəkilişlərinə maraq göstərmir və gələcəyini daha çox ailəsi ilə birlikdə keçirmək istəyir.
“The Hollywood Reporter Awards Chatter” podkastının yeni buraxılışında danışan Bolduin etiraf edib ki, son illər yaşadıqları onun peşəyə münasibətini kökündən dəyişib. Aktyor xüsusilə 2021-ci ildə “Rust” filminin çəkilişləri zamanı baş verən faciənin həyatına ciddi təsir etdiyini vurğulayıb. Həmin hadisə nəticəsində ukraynalı operator Halina Hatçins həyatını itirmişdi.
Faciədən sonra dəyişən həyat
Bolduin bildirib ki, son üç il yarım ərzində demək olar ki, işləməyib və vaxtını əsasən ailəsinə həsr edib. Onun sözlərinə görə, bu dövr həyatının ən çətin mərhələlərindən biri olub:
“Mən artıq evdən çıxmaq istəmirəm. İşləmək istəmirəm. Açığı, buna ehtiyac da duymuram. Sadəcə təqaüdə çıxıb uşaqlarımla birlikdə olmaq istəyirəm”.
Aktyor əlavə edib ki, baş verənlər onun həm karyerasına, həm maliyyə vəziyyətinə, həm də ailə həyatına ciddi təsir göstərib. Eyni zamanda, bu hadisələr onun sağlamlığı və psixoloji vəziyyəti üçün də ağır nəticələr doğurub.
Gələcək planlar hələ dəqiq deyil
Qeyd edək ki, Bolduinə qarşı açılmış ehtiyatsızlıqdan adam öldürmə işi yalnız 2024-cü ilin iyulunda bağlanıb. Buna baxmayaraq, aktyor “Rust” filminin çəkilişlərini hüquqi razılaşma çərçivəsində başa çatdırmalı olub.
Hazırda Bolduin karyerasını nə vaxt rəsmi şəkildə bitirəcəyi ilə bağlı konkret tarix açıqlamayıb. Bununla belə, onun açıqlamaları sənayedən tədricən uzaqlaşmaq niyyətinin ciddi olduğunu göstərir.
