Bakının qədim tarixi, zəngin mədəniyyəti və davamlı inkişafı birləşdirən şəhər kimi tanınması ilə yanaşı, COP29-un burada keçirilməsi Azərbaycanın ətraf mühit sahəsindəki öncül rolunu bir daha sübut edir. Bu beynəlxalq tədbir Azərbaycan üçün yaşıl enerji və ətraf mühitin qorunmasında atılan addımların təqdimatı üçün unikal platformadır. Azərbaycanın İkinci Qarabağ müharibəsində qazandığı qələbədən sonra davamlı inkişaf və ətraf mühitin qorunması sahələrində böyük irəliləyişlər əldə etməsi də aydın görünür. Ölkə yalnız təbii sərvətləri ilə deyil, həm də ekologiyanı qoruma və yaşıl iqtisadiyyat yaratma sahəsindəki təşəbbüsləri ilə diqqəti cəlb edir.
Bu fikirləri Türk siyasətçisi və Milliyyətçi Hərəkat Partiyasının sabiq deputatı Arzu Erdem Daylinews-az-a müsahibəsində bildirib.
Arzu Erdem Azərbaycanın bərpaolunan enerji sahəsində yatırımlarını vurğulayaraq, ölkənin regionda bir nümunə olduğunu qeyd edib: “COP29-un Bakıda keçirilməsi Azərbaycanın bu sahədə qətiyyətini və uğurlarını bütün dünyaya göstərir. Xəzərin incisi olan Bakı, müxtəlif ölkələrdən liderləri qəbul edərək həm qonaqpərvərliyini, həm də ətraf mühitə olan həssaslığını nümayiş etdirir. Azərbaycan iqlim dəyişikliyinə qarşı mübarizə çərçivəsində hazırladığı enerji strategiyaları, qazıntı yanacaqların istifadəsinin azaldılması yönündəki fəaliyyəti və bərpaolunan enerji yatırımları ilə gələcəyə dayanıqlı yanaşmasını nümayiş etdirir. COP29-un Azərbaycanda keçirilməsi bütün yanacaq istehsalçısı ölkələr üçün iqlim dəyişikliyi mübarizəsində fəal iştirakın zəruriliyini vurğulayan bir ismarıcdır.”
Erdem, Azərbaycanın bu tədbirə ev sahibliyinin yanacaq istehsal edən digər ölkələrə də enerji keçidini daha dayanıqlı etmək üçün ilham verdiyini bildirib: “COP29 çərçivəsində belə bir ölkədə fosil yanacaqlardan asılılığın azaldılması məsələsinin vurğulanması qlobal enerji transformasiyasının hamı üçün nə qədər əhəmiyyətli olduğunu daha aydın göstərir. Azərbaycan, davamlı inkişaf və yaşıl enerjiyə keçid istiqamətində irəliyə doğru ciddi addımlar ataraq artıq qlobal səviyyədə diqqət mərkəzinə çevrilib. 2024-cü ildən başlayaraq “yaşıl transformasiya” layihələrinə milyardlarla dollar sərmayə qoymaq planı ilə Azərbaycan, bütün yanacaq ixracatçıları üçün parlaq bir nümunə rolunu oynayır. Bu addım iqtisadiyyatını daha dayanıqlı və təmiz gələcəyə yönəltmək baxımından böyük bir töhfədir.”
Arzu Erdem əlavə olaraq COP29-un keçirilməsi ilə yanaşı, Azərbaycan və Türkiyə arasında “yaşıl qardaşlıq” sahəsində əməkdaşlığın genişlənməsinə də toxunub: “Bu təşəbbüs çərçivəsində Xəzər dənizindən Anadoluya qədər külək enerjisi dəhlizinin yaradılması mümkündür. Azərbaycanın bərpaolunan enerji potensialının Türkiyənin texnoloji infrastrukturu ilə inteqrasiyası geniş imkanlar yaradacaq. Azərbaycan neft və qaz istehsalını genişləndirdiyi kimi, yaşıl enerji sahəsində də yatırım edir. Türkiyə isə 2030-cu ilə qədər enerjinin 40%-ni bərpaolunan mənbələrdən əldə etməyi hədəfləyir. Hər iki ölkənin əməkdaşlığı sayəsində “Yaşıl enerji yolu” illik 30 teravatsaatlıq potensiala malikdir ki, bu da strateji əhəmiyyətini daha da artırır.”
