Azərbaycan dilinin inkişafı istiqamətində növbəti mühüm addım atılır. Orfoqrafiya və orfoepiya lüğətlərinin yenilənmiş versiyaları artıq nəşr mərhələsinə yaxınlaşır və yaxın günlərdə çap üçün təqdim olunacaq.
Bu barədə məlumatı AMEA Dilçilik İnstitutunun baş direktoru, professor Nadir Məmmədli verib. Onun sözlərinə görə, lüğətlərin hazırlanması ilə bağlı işlər son mərhələyə çatıb və yaxın vaxtlarda çap prosesinə start veriləcək.
Yeni lüğətlər hansı mərhələdədir?
Məlumata əsasən, bu gün layihə ilə bağlı növbəti iclas keçirilib və prosesin yekunlaşdırılması istiqamətində müzakirələr aparılıb. Nadir Məmmədli bildirib ki, gələn həftə daha bir toplantı nəzərdə tutulur və bundan sonra texniki hazırlıq işləri tamamlanacaq:
“Yəqin ki, növbəti həftədən etibarən çapla bağlı yekun addımlar atılacaq. Lüğətlərin nəşr edilməsi isə artıq AMEA Rəyasət Heyətinin qərarından asılıdır”.
Bu açıqlama göstərir ki, layihə demək olar ki, başa çatıb və artıq rəsmi təsdiq mərhələsinə daxil olub.
İlk dəfə tətbiq olunan yanaşma
Yeni orfoqrafiya lüğətinin hazırlanmasında tətbiq olunan metodologiya xüsusilə diqqət çəkir. Professorun sözlərinə görə, bu lüğət ilk dəfə olaraq dil korpusu əsasında tərtib edilib. Bu isə Azərbaycan dilçiliyində mühüm yenilik hesab olunur.
“Dil korpusu əsasında lüğətin hazırlanması indiyədək heç bir türk dövlətində həyata keçirilməyib. Bu sahədə Azərbaycan ilk addımı atan ölkədir”, – deyə o vurğulayıb.
Mütəxəssislər hesab edir ki, bu yanaşma lüğətlərin daha dəqiq, sistemli və müasir dil tələblərinə uyğun hazırlanmasına imkan verəcək. Yeni nəşrlər həm elmi ictimaiyyət, həm də geniş oxucu kütləsi üçün mühüm mənbə olacaq.
