Azərbaycan Mərkəzi Bankı (AMB) İqtisadi Əməkdaşlıq və İnkişaf Təşkilatının (OECD) Maliyyə Savadlılığı üzrə Beynəlxalq Şəbəkəsinin 2025-ci il noyabr ayında Fransanın paytaxtı Paris şəhərində keçirilən iclasında tamhüquqlu üzv kimi təmsil olunub. AMB-nin Maliyyə məlumatlılığı və peşəkar inkişaf şöbəsinin nümayəndələrinin qatıldığı görüşdə, şəbəkənin 2026-cı il fəaliyyət istiqamətləri geniş şəkildə müzakirə edilib və rəqəmsal maliyyə savadlılığı sahəsində innovativ siyasət tövsiyələri təqdim olunub.
İclas zamanı xüsusilə yetkin əhali qrupları arasında maliyyə savadlılığının ölçülməsi üzrə sorğu metodlarının təkmilləşdirilməsinə dair məqamlar qaldırılıb. Eyni zamanda, maliyyə savadlılığı üzrə geniş əhatəli “Beynəlxalq Şagird Qiymətləndirmə Proqramı 2029” (PISA) araşdırmasında ölkələrin iştirakının önəmi vurğulanıb. Bu proqram çərçivəsində Azərbaycanın təşəbbüsü ilə iqlim savadlılığı da qiymətləndirməyə daxil ediləcək. İclasın sonunda süni intellektin maliyyə savadlılığı proqramlarına tətbiqi, həm faydaları, həm də riskləri barədə müzakirə paneli təşkil olunub.
Növbəti gün keçirilən simpoziumda müxtəlif ölkələrdən gələn nümayəndələr maliyyə savadlılığının inkişafı üçün uğurlu layihələr təqdim edərək təcrübə mübadiləsi aparıblar. AMB 2025-ci ilin iyul ayında bu beynəlxalq şəbəkəyə tamhüquqlu üzv qəbul edilib. Bu üzvlük AMB-yə qlobal əməkdaşlıqlarda iştirak etmək, beynəlxalq təcrübə və siyasət tövsiyələrindən birbaşa yararlanmaq, həmçinin şəbəkənin işçi qruplarına və təşəbbüslərinə qoşulmaq imkanı verir.
