İnnovasiya və Rəqəmsal İnkişaf Agentliyinin tərəfdaşlığı ilə Azərbaycan və Türkiyə arasında informasiya-kommunikasiya texnologiyaları sahəsində əməkdaşlığın gücləndirilməsinə həsr olunmuş biznes forum keçirilib. “Azərbaycan – Türkiyə biznes forumu: Rəqəmsal transformasiya və texnologiya körpüsü” adı altında təşkil olunan tədbir iki ölkənin texnoloji ekosistemlərini bir araya gətirib.
Forum İRİA, Türk İnformasiya Texnologiyaları Sənayeçiləri Assosiasiyası və “Sistem Global Danışmanlık A.Ş” şirkətinin birgə tərəfdaşlığı ilə baş tutub. Tədbirdə ümumilikdə 70 İKT şirkəti, maliyyə qurumları və hər iki ölkənin müxtəlif dövlət strukturlarının rəhbər nümayəndələri iştirak ediblər.
Açılış nitqi ilə çıxış edən rəqəmsal inkişaf və nəqliyyat nazirinin müavini Samir Məmmədov forumun strateji əhəmiyyətini vurğulayıb. O bildirib ki, Azərbaycan və Türkiyə rəqəmsal transformasiyanı dövlət siyasətinin əsas istiqamətlərindən biri kimi qəbul edir: “Hər iki ölkə texnologiyanı iqtisadi inkişafın, dövlət idarəçiliyində səmərəliliyin və rəqabətqabiliyyətli biznes mühitinin əsas aləti kimi görür. Bu platforma şirkətlər arasında real nəticələrə yönəlmiş əməkdaşlıq üçün yeni imkanlar yaradır”.
Panel müzakirələri və əməkdaşlıq imkanları
Rəsmi hissədə Türkiyənin Azərbaycandakı səfiri Birol Akgün, TÜBİSAD-ın İdarə Heyətinin sədri Mehmet Ali Tombalak, İRİA-nın kommersiya üzrə baş inzibatçısı Salar İmaməliyev və “Sistem Global Danışmanlık”ın İdarə Heyətinin sədri Hüseyn Karslıoğlu çıxış edərək iki ölkə arasında İKT sahəsində əlaqələrin genişlənmə perspektivlərindən danışıblar.
Panel müzakirələrində aşağıdakı istiqamətlər diqqət mərkəzində olub:
- Rəqəmsal transformasiya strategiyaları
- GovTech həlləri və dövlət xidmətlərinin rəqəmsallaşdırılması
- Süni intellekt və “ağıllı şəhər” layihələri
- İKT sektorunda insan kapitalının inkişafı
Forumun ikinci hissəsində B2B və B2G görüşlər keçirilib. Bu sessiyalar çərçivəsində dövlət və özəl sektor nümayəndələri texnoloji həllər, investisiya imkanları, startapların maliyyələşdirilməsi və innovativ layihələrin birgə icrası məsələlərini müzakirə ediblər.
Tədbirin təşkilində iştirak edən “Sistem Global Danışmanlık” şirkəti 10-dan artıq ölkədə fəaliyyət göstərir və Türkiyənin aparıcı konsaltinq qurumlarından biri hesab olunur. Forumun əsas məqsədi iki ölkənin texnoloji ekosistemləri arasında davamlı tərəfdaşlıq mexanizmlərinin formalaşdırılması və rəqəmsal sahədə strateji əlaqələrin dərinləşdirilməsidir.
