21 yaşadək futbolçulardan ibarət Azərbaycan millisi Avropa çempionatının seçmə mərhələsində növbəti oyununu Bakıda keçirib. “Liv Bona Dea Arena”da baş tutan qarşılaşmada Rəşad Eyyubovun komandası Şotlandiya ilə 3:3 hesablı bərabərlik əldə edib.
Oyuna sürətli başlayan millimiz artıq 7-ci dəqiqədə Xəyal Əliyevin qolu ilə hesabı açıb. 33-cü dəqiqədə Devid Uotson bərabərlik qolu vuraraq rəqiblərin hesabı 1:1 etməsinə nail olub. İlk hissənin sonlarında Lyuk Qrem Şotlandiyanı önə keçirsə də, ikinci yarıda Azərbaycan yenidən oyunu nəzarətə götürüb.
49-cu dəqiqədə Xəyal Əliyev penaltidən dublunu rəsmiləşdirib və hesabı 2:2 edib. 79-cu dəqiqədə Şahin İbrahimovun dəqiq zərbəsi ilə millimiz yenidən irəli çıxsa da, oyunun əlavə vaxtında Semuel Klipp Hardinqin qolu nəticədə bərabərliklə yekunlaşan matça nöqtə qoyub.
Baş məşqçi Rəşad Eyyubov matçdan sonra komandasının mübarizəsini yüksək qiymətləndirərək bildirib: “Futbolçularım Çexiya ilə ağır məğlubiyyətdən sonra əsl döyüş ruhu göstərdilər. Şotlandiyaya üç qol vurmaq asan deyil – nə Portuqaliya, nə də Çexiya bunu bacara bilmişdi. Təəssüf ki, qələbəni son dəqiqələrdə əldən verdik.”
Bu nəticə ilə Azərbaycan U-21 millisi B qrupundakı ikinci heç-heçəsinə nail olaraq aktivindəki xal sayını 2-yə çatdırıb.
