Bu gün Azərbaycan Respublikasının dövlət quruculuğunda mühüm yer tutan – Konstitusiyanın qəbul edilməsinin ildönümüdür. Hazırda qüvvədə olan Konstitusiya 30 il əvvəl, 1995-ci il 12 noyabrda ümumxalq referendumu ilə qəbul edilib və ölkənin müstəqillik tarixində yeni bir mərhələ açıb.
Sovet dövründə Azərbaycan ilk dəfə 1921-ci il mayın 19-da Konstitusiya qəbul etmişdi. Sonrakı illərdə SSRİ-nin tərkibində Konstitusiya tez-tez dəyişərək yenilənib – 1925-ci və 1978-ci illərdə bunun bariz nümunələridir. Lakin Azərbaycan dövlət müstəqilliyini bərpa etdikdən sonra hüquqi dövlət quruculuğu məqsədilə tamamilə müstəqil və yeni Konstitusiya layihəsi hazırlanıb.
1994-cü ildən etibarən Prezident Heydər Əliyevin rəhbərliyi altında Konstitusiya komissiyası fəaliyyətə başlayır və nəticədə yeni layihə 1995-ci ildə ümumxalq müzakirəsinə təqdim olunur. Sonda, 12 noyabr tarixində keçirilən referendumda vətəndaşların əksəriyyətinin dəstəyi ilə müasir Konstitusiya qəbul olunub.
Ana qanun 5 bölmə, 12 fəsil və 158 maddədən ibarətdir və dövrün tələblərinə uyğun olaraq 2002, 2009 və 2016-cı illərdə referendum yolu ilə bir sıra dəyişiklik və əlavələr edilib. Konstitusiyanın qəbul olunduğu tarix – 12 noyabr, 1996-cı ildən etibarən ölkədə rəsmi olaraq Konstitusiya Günü kimi qeyd olunur.
