Bakının Heydər Əliyev Beynəlxalq Aeroportu ilə “Uzbekistan Airports” şirkəti aviahabların infrastrukturunun modernləşdirilməsi və qabaqcıl texnologiyaların tətbiqi istiqamətində əməkdaşlığı genişləndirir. Bu barədə “Uzbekistan Airports” rəsmi məlumat yayıb.
Son olaraq Daşkənddə keçirilən Beynəlxalq Aviasiya-Logistika Forumu çərçivəsində şirkətin İdarə Heyətinin sədri Javlonbek Umarxocayev və Bakı aeroportunun direktoru Teymur Həsənov arasında görüşdə iki ölkənin hava limanlarının inkişafı, sərnişinlərin rahatlığının və təhlükəsizliyinin artırılması məqsədilə ekoloji, enerji qənaətcil və rəqəmsal texnologiyaların tətbiqinin genişləndirilməsi müzakirə olunub.
Qeyd edilir ki, hava limanlarının təkmilləşdirilməsi nəqliyyat sektorunun davamlı inkişaf strategiyasının əsas tərkib hissəsidir və Azərbaycan və Özbəkistan arasında tranzit imkanlarının artırılmasında böyük rol oynayır.
Bakıya səfər etmiş “Uzbekistan Airports” nümayəndə heyəti Özbəkistanda hava limanlarının işinin təşkili və infrastruktur məsələləri ilə bağlı təcrübə toplamaqdadır.
