Bakı şəhərinin Nizami rayonu, Şirin Mirzəyev küçəsində yerləşən “Sherlock Music Pub” restoranında qalmaqallı hadisə baş verib.
Daylinews-az.com-un məlumatına görə, restoranda müştərilər arasında mübahisə yaranıb. Hadisə zamanı spirtli içki qəbul etdiyi bildirilən gənc qadın qonşu masada oturan tanımadığı bir şəxsi yüksək səslə təhqir edib və ictimai asayişi pozub.
Məlumata görə, həmin şəxs qadının hesabını ödəmək istədiyini bildirib. Bu jest qadının qəzəbinə səbəb olub və mübahisəyə çevrilib. Hadisə yerinə gələn Nizami Rayon Polis İdarəsinin 25-ci Polis Bölməsinin əməkdaşlarının qanuni tələblərinə tabe olmayan qadın bölməyə aparılıb.
Araşdırmalar nəticəsində məlum olub ki, ictimai asayişi pozan şəxs Xaçmaz rayonunun Xudat şəhər sakini, 1987-ci il təvəllüdlü N.İsmayılovadır (şəxsin adı və soyadı şərtidir – red.). Barəsində İnzibati Xətalar Məcəlləsinə uyğun olaraq protokol tərtib edilib və iş materialları məhkəməyə göndərilib.
Məhkəmə ifadəsi:
Məhkəmə iclasında qadın baş verənləri belə izah edib: “Qonşu masada oturan kişi mənim tanımadığım biri idi. O, hesabımı ödəmək istədi, lakin mən razılaşmadım. Bu, aramızda mübahisəyə səbəb oldu. Polis gəldi və məni bölməyə apardı. Hərəkətimə görə peşmanam.”
Nəticədə, Nizami Rayon Məhkəməsinin qərarı ilə qadın 5 sutka müddətinə inzibati qaydada həbs olunub.
