Qurban bayramı və Müstəqillik Günü ilə əlaqədar ölkə üzrə fəaliyyət göstərən bütün avtovağzal və avtostansiyalar xüsusi iş rejiminə keçir. Sərnişin axınının artacağını nəzərə alan aidiyyəti qurumlar mayın 26-dan 31-dək nəqliyyat xidmətlərinin fasiləsiz təşkili üçün əlavə tədbirlər görəcək.
Azərbaycan Yerüstü Nəqliyyat Agentliyinin yaydığı məlumata görə, şəhərlərarası və rayonlararası marşrutlarda sərnişindaşıma həyata keçirən avtobusların təhlükəsiz və qrafikə uyğun fəaliyyəti ciddi nəzarətdə saxlanılacaq. Kassalarda biletlərin müəyyən edilmiş tariflər əsasında satılması və sərnişin sıxlığının qarşısının alınması üçün də müvafiq tapşırıqlar verilib.
Əlavə avtobuslar xəttə buraxılacaq
Bayram günlərində xüsusilə Bakı Beynəlxalq Avtovağzal Kompleksində gücləndirilmiş nəzarət tətbiq olunacaq. Sərnişin sayından asılı olaraq bəzi istiqamətlər üzrə əlavə avtobusların xəttə çıxarılması planlaşdırılır.
Qurum sürücülərə təhlükəsizlik qaydalarına ciddi əməl etməyi tapşırıb. Eyni zamanda, avtobusların təsdiqlənmiş hərəkət cədvəlinə uyğun işləməsi nəzarətdə saxlanılacaq.
Vətəndaşlar biletləri həm avtovağzalların kassalarından, həm də onlayn qaydada əldə edə bilərlər. Hazırda “biletim.az” portalı vasitəsilə 58 istiqamət üzrə 94 marşruta bilet satışı mümkündür. Sistemdə 409 nəqliyyat vasitəsi və 361 reys aktiv şəkildə fəaliyyət göstərir.
Mütəxəssislər sərnişinlərə vaxt itkisinin qarşısını almaq və rahat səfər etmək üçün biletləri əvvəlcədən onlayn almağı tövsiyə edirlər.
