Apple şirkətinin ən incə modeli olan “iPhone Air” Çində satışa çıxan kimi rekord bir zamanda – cəmi beş dəqiqə ərzində bütün stoklarda tükənib. GizmoChina xəbər verir ki, bu model eSIM texnologiyasını dəstəkləyir və digər ölkələrdə satışa çıxarıldıqdan bir ay sonra Çin bazarında debüt edib.
Rəsmi satışlar cümə günü axşam saat 20:00-da Apple-ın Çin rəsmi saytı ilə yanaşı JD.com və Tmall kimi əsas e-ticarət platformalarında başladılıb və 20:05-dək bütün mövcud cihazlar satılıb. Təchizatın məhdudluğu satışın ilk dəqiqələrində ciddi ajiotaja səbəb olub və nəticədə çatdırılma müddətləri artıq bir-iki həftə sonraya təxirə salınıb.
Pekin, Şanxay və Tyanjin də daxil olmaqla iri şəhərlərdəki Apple mağazalarının qarşısında uzun növbələr yaranıb. Analitiklər hesab edir ki, ilk dalğada satışa çıxarılan cihazların sayı bir neçə yüz minə çata bilər, lakin Apple konkret rəqəmləri açıqlamayıb.
Uğurlu satış startı şirkətin baş direktoru Tim Kukun Çinə strateji səfəri ilə üst-üstə düşüb. Kuk burada vitse-premyer Xə Lifən və ticarət naziri Van Ventao ilə görüşlər keçirib, Apple-ın gələcək böyümə planlarını, ticarət əlaqələrini və yerli tərəfdaşlarla əməkdaşlıq imkanlarını müzakirə edib. Bir sıra startaplar, təchizatçılar və Tsinxua Universitetinin İqtisadiyyat və Menecment Məktəbi də onun səfər gündəmində olub; burada Tim Kuk ətraf mühit liderlik proqramlarının dəstəklənməsi üçün ianə etdiklərini açıqlayıb.
Tim Kukun səfəri Çin sosial şəbəkələrində böyük rezonansa səbəb olub və yeni modelin satışa startı öncəsi həyəcanı daha da artırıb.
