Məşhur britaniyalı aktyor Daniel Radcliffe kino və teatr sahəsində çoxsaylı rollar ifa etsə də, milyonlarla tamaşaçı üçün o, hələ də “seçilmiş oğlan” kimi tanınır. Bu səbəbdən onun “Harri Potter” seriyasındakı favorit filmi daim maraq doğurub.
Radcliffe məşhur “Happy Sad Confused” podkastında bildirib ki, onun üçün seriyanın ən yaxşı hissəsi Harry Potter and the Deathly Hallows – Part 2 filmidir.
Onun sözlərinə görə, bu seçim təsadüfi deyil. Film on illik hekayənin möhtəşəm finalı olmaqla yanaşı, emosional yükü və hadisələrin kulminasiyası ilə seçilir.
Hoqvarts uğrunda döyüş səhnələri və Lord Voldemort ilə son qarşıdurma aktyorun karyerasında ən çətin və intensiv çəkilişlərdən biri olub. Radcliffe qeyd edib ki, bu səhnələr həm fiziki, həm də emosional baxımdan maksimum tələbkar idi.
“Bir ailəyə çevrilmiş komanda”
Aktyor vurğulayıb ki, son film üzərində işləyərkən çəkiliş heyəti artıq sadəcə iş yoldaşı deyil, bir ailəyə çevrilmişdi. Bu yaxınlıq isə performansa da birbaşa təsir göstərib.
Qeyd edək ki, Harry Potter and the Deathly Hallows – Part 2 dünya üzrə 1 milyard dollardan çox gəlir əldə edərək franşizanın ən uğurlu hissələrindən biri olub.
Radcliffe üçün isə bu film sadəcə layihə deyil — 11 yaşında başladığı yolun emosional yekunudur.
