Prezident İlham Əliyevin Vaşinqtonda keçirilən Sülh Şurasının ilk iclasında iştirakı Azərbaycanın beynəlxalq arenadakı mövqeyinin möhkəmləndiyini bir daha nümayiş etdirir. ABŞ Prezidentinin Azərbaycanla bağlı səsləndirdiyi müsbət fikirlər də ölkənin regional və qlobal proseslərdə artan roluna diqqətin göstəricisi kimi dəyərləndirilir.
Milli Məclisin deputatı Vüqar Bayramov parlamentin plenar iclasında çıxışı zamanı bildirib ki, Sülh Şurası yalnız siyasi platforma deyil, həm də dünyanın aparıcı iqtisadi güclərini bir araya gətirən mühüm formatdır.
Onun sözlərinə görə, alıcılıq qabiliyyəti indeksi nəzərə alınmaqla quruma üzv ölkələrin ümumi ÜDM-i 54,4 trilyon dollar təşkil edir ki, bu da dünya iqtisadiyyatının təxminən üçdə birinə bərabərdir.
“Söhbət 50 trilyon dollardan artıq iqtisadi potensiala malik dövlətlərin iştirakı ilə keçirilən yüksək səviyyəli toplantıdan gedir”, – deyə deputat vurğulayıb.
Azərbaycan “orta güc” dövlət kimi mövqeyini möhkəmləndirir
V.Bayramov qeyd edib ki, Azərbaycanın belə bir platformaya dəvət olunması ölkəyə göstərilən xüsusi diqqətin bariz nümunəsidir.
Onun fikrincə, yeni qlobal düzənin formalaşdığı bir mərhələdə Prezident İlham Əliyevin rəhbərliyi ilə həyata keçirilən çoxvektorlu xarici siyasət Azərbaycanın geosiyasi çəkisini artırıb və ölkəni regionda “orta güc” statusuna yüksəldib.
Deputat həmçinin bildirib ki, Qərb və Şərq arasında balanslı tərəfdaşlıq siyasəti Azərbaycanın regional təhlükəsizliyin təmin olunmasında rolunu gücləndirib. ABŞ-də siyasi dəyişikliklərdən sonra iki ölkə arasında münasibətlərin inkişaf dinamikasının müşahidə olunduğunu vurğulayan Bayramov əlavə edib:
“Qafqazda sülhün təşviqi istiqamətində ABŞ ilə əməkdaşlıq genişlənir və ikitərəfli münasibətlər yeni mərhələyə qədəm qoyur”.
Yaxın Şərq istiqamətində fəal siyasət
Deputatın sözlərinə görə, Azərbaycan Yaxın Şərq regionunda sabitliyin və sülhün təmin olunmasında maraqlı tərəf kimi çıxış edir. Son illər region ölkələri ilə əlaqələrin intensivləşməsi və birgə layihələrin həyata keçirilməsi ölkənin diplomatik fəallığını artırıb.
V.Bayramov hesab edir ki, Sülh Şurasında təmsilçilik və Vaşinqtonda keçirilən ilk iclasda iştirak Azərbaycanın qlobal sülh təşəbbüslərində fəal rol oynadığını göstərir. Yeni regional və beynəlxalq reallıqlar fonunda ölkənin geosiyasi mövqeyi daha da möhkəmlənir.
