İranın xarici işlər nazirinin müavini Kazım Qəribabadi Naxçıvan Beynəlxalq Hava Limanına edilən dron hücumu ilə bağlı yayılan məlumatlara münasibət bildirib. O, bu barədə Azərbaycanın “AnewZ” televiziya kanalına açıqlamasında danışıb.
Rəsmi bildirib ki, İranın dövlət siyasəti qonşu ölkələrə qarşı hərbi hücumlar həyata keçirməyi nəzərdə tutmur. Onun sözlərinə görə, Tehran yalnız öz təhlükəsizliyinə təhdid hesab etdiyi obyektləri hədəf almaq hüququnu saxlayır.
Qəribabadi qeyd edib:
“İran İslam Respublikasının siyasəti qonşu ölkələrə hücum etmək və ya onları hədəfə almaq deyil. Lakin əgər həmin ərazilərdə ABŞ və İsrail rejiminin hərbi obyektləri yerləşərsə və bu obyektlər İrana qarşı hücumlar üçün istifadə olunarsa, o zaman biz həmin hədəflərə zərbə endirə bilərik. Biz əvvəldən elan etmişik ki, hansı baza İrana qarşı istifadə edilərsə, o da cavab tədbirlərimizin hədəfi olacaq. Bu, bizim açıq şəkildə bəyan etdiyimiz siyasətdir”.
Naxçıvan hava limanına dron hücumu
Xatırladaq ki, bir müddət əvvəl İran ərazisindən Naxçıvan Muxtar Respublikasında yerləşən Naxçıvan Beynəlxalq Hava Limanına dron hücumu həyata keçirildiyi barədə məlumat yayılmışdı. Hadisə regionda ciddi narahatlıq doğurmuş və Azərbaycan tərəfi dərhal məsələyə reaksiya vermişdi.
Baş verən hadisədən sonra Azərbaycan Müdafiə Nazirliyi rəsmi açıqlama yayaraq hücuma görə məsuliyyətin İran İslam Respublikasının üzərinə düşdüyünü bildirmişdi. Nazirlik qeyd etmişdi ki, ölkənin suverenliyi və ərazi bütövlüyünün qorunması üçün bütün zəruri tədbirlər görüləcək.
Bəyanatda həmçinin vurğulanmışdı ki, mülki şəxslərin təhlükəsizliyi və mülki infrastrukturun qorunması Azərbaycan üçün prioritet məsələdir. Buna görə də baş verən hadisə diqqətlə araşdırılır və adekvat cavab addımlarının hazırlanması istiqamətində iş aparılır.
Rəsmi qurumlar belə hücumların regionda gərginliyi artırdığını bildirərək, Azərbaycanın öz təhlükəsizliyini təmin etmək üçün bütün hüquqi və hərbi imkanlardan istifadə edəcəyini qeyd edib.
