79-cu Kann Beynəlxalq Film Festivalının münsiflər heyətinə kimin sədrlik edəcəyi məlum olub. Bu il mayın 12-dən 23-dək keçiriləcək nüfuzlu kino tədbirində jüriyə Cənubi Koreyanın tanınmış rejissoru, ssenaristi və prodüseri Pak Çan-uk rəhbərlik edəcək. O, ötən il bu vəzifəni icra etmiş fransız aktrisa Jülyet Binoşu əvəzləyəcək.
Kann festivalı dünya kinosunun ən prestijli platformalarından biri hesab olunur və münsiflər heyətinin sədri əsas mükafat – “Qızıl Palma budağı”nın taleyində həlledici rol oynayır. Festival rəhbərliyi açıqlamasında Pak Çan-ukun yaradıcılıq üslubunu xüsusi vurğulayıb.
Prezident İris Knoblox və baş direktor Tyerri Fremo bildiriblər: “Pak Çan-ukun orijinal baxışı, vizual ustalığı və mürəkkəb taleləri olan obrazları ekrana gətirmə bacarığı müasir kinoya unudulmaz əsərlər bəxş edib. Onun istedadını bu vəzifə ilə qeyd etməkdən məmnunuq”.
Pak Çan-ukun uğur yolu
Rejissor həm Koreyada, həm də beynəlxalq miqyasda çoxsaylı mükafatlara layiq görülüb. Onun “Qərar vermək” filmi Kann festivalında “Ən yaxşı rejissor” mükafatını qazanıb.
Bundan başqa, Venesiya festivalında “Kiçik Qızıl Şir”, Berlin festivalında isə “Gecə balıq ovu” qısametrajlı filminə görə “Ayı” mükafatı əldə edib. Pak Çan-uk 2004-cü ildə Kann festivalında təqdim etdiyi “Qoca oğlan” filmi ilə Böyük mükafata layiq görülmüşdü.
Sonrakı illərdə də o, müxtəlif işləri ilə festivala qayıdaraq münsiflərin yüksək qiymətini qazanıb. Onun jüri sədri kimi seçilməsi festivalın beynəlxalq xarakterini və Asiya kinosunun qlobal nüfuzunu bir daha nümayiş etdirir.
