“Real Madrid”in sabiq baş məşqçisi, hazırda isə Braziliya yığmasına rəhbərlik edən Karlo Ançelotti İspaniyada vergidən yayınma işi üzrə məhkəmə hökmünü alıb – təcrübəli məşqçi 1 il azadlıqdan məhrum edilib.
Ançelottiyə qarşı iki epizod üzrə ittiham irəli sürülmüşdü – 2014 və 2015-ci illərdə. Məhkəmə məşqçini 2014-cü ildə 386 min avro məbləğində vergidən yayınma işi üzrə günahkar sayıb.
İkinci epizod üzrə isə bəraət verilib.
Buna baxmayaraq, Ançelottinin faktiki olaraq həbsxanaya düşəcəyi gözlənilmir. İspaniya qanunlarına əsasən, zorakılıqla əlaqəsi olmayan cinayətlər üzrə 2 ilə qədər cəza verilmiş şəxslər adətən həbs olunmur, lakin rəsmi olaraq məhkum statusunda qalırlar.
Ançelotti həmçinin müxtəlif cərimələr ödəməli olacaq – bu cərimələr 386 min avrodan əhəmiyyətli dərəcədə çoxdur (dəqiq məbləğ açıqlanmayıb).
Qeyd edək ki, məşqçinin ümumi vergi borcu 1,2 milyon avro təşkil edir.
