Bakıda və ətraf ərazilərdə köhnə tikili mənzillərin qiymətində son aylarda nəzərəçarpacaq artım müşahidə olunur. Əvvəllər alıcıların daha çox yeni tikililərə üstünlük verməsinə baxmayaraq, hazırda daşınmaz əmlak bazarında tendensiya dəyişib. Ekspertlər bildirirlər ki, xüsusilə paytaxtın mərkəzi və metroya yaxın ərazilərində yerləşən köhnə binalara maraq kəskin şəkildə yüksəlib.
Əmlak bazarındakı bu canlanmanın əsas səbəblərindən biri yeni tikililərdə qiymətlərin rekord həddə çatmasıdır. Son dövrlərdə tikinti materiallarının bahalaşması və mənzil bazarında təklifin məhdudlaşması yeni binalarda qiymətləri daha da artırıb. Bu isə alıcıları alternativ seçim kimi köhnə mənzillərə yönəldib.
Söküntü planları bazara təsir edir
Daşınmaz əmlak üzrə ekspert Elnur Azadov bildirib ki, köhnə binalara marağın artması yalnız qiymətlə bağlı deyil. Onun sözlərinə görə, şəhərdə aparılan yenidənqurma və söküntü layihələri də bazara ciddi təsir göstərir:
“İnsanlar düşünür ki, köhnə binadan alınan mənzil gələcəkdə söküntü zamanı daha sərfəli kompensasiya və ya yeni mənzil əldə etmək imkanı yarada bilər. Bu səbəbdən bəzi alıcılar investisiya məqsədilə də köhnə tikililərə üstünlük verirlər”.
Bir müddət əvvəl köhnə mənzillərin əsas çatışmazlığı onların ipoteka üçün uyğun olmaması hesab edilirdi. Buna görə də alıcıların böyük hissəsi yeni tikililərə yönəlirdi. Hazırda isə qiymət fərqinin böyüməsi alıcıların seçimlərinə birbaşa təsir edir.
Ekspertlərin fikrincə, bazarda mövcud dinamika yaxın aylarda da davam edə bilər. Xüsusilə söküntü gözlənilən ərazilərdə köhnə mənzillərin qiymətinin daha da bahalaşacağı istisna edilmir.
