Portuqaliya millisinin və Səudiyyə Ərəbistanının “Əl-Nəsr” klubunun ulduz futbolçusu Kriştiano Ronaldo, qələbədən sonra cütlük fotosunu izləyiciləri ilə bölüşüb.
Daylinews-az.com xəbər verir ki, Ronaldo İnstagram hesabında həyat yoldaşı Corcina Rodrigez və Millətlər Liqasının kuboku ilə birgə şəklini yayımlayıb. Təcrübəli hücumçu paylaşımına yalnız kubok və qırmızı ürək emojiləri ilə şərh verib.
Xatırladaq ki, Portuqaliya yığması Millətlər Liqasının finalında İspaniya üzərində penaltilərlə qələbə qazanaraq (əsas vaxt – 2:2, penaltilər – 5:3) turnirin qalibi olub. Ronaldo bu oyunda bir qol vurub, lakin 88-ci dəqiqədə zədələndiyi üçün əvəzlənib.
Bu, Ronaldo üçün Portuqaliya millisində üçüncü böyük titul oldu. O, daha əvvəl 2016-cı ildə Avropa çempionluğu və 2019-cu ildə ilk Millətlər Liqası kubokunu qazanmışdı.
Cütlük 2016-cı ildən bəri münasibətdədir. Onların iki ortaq qızı var. Bundan əlavə, Ronaldonun əvvəlki münasibətlərindən üç övladı daha var.
