Bu gün – 3 iyul tarixində Heydər Əliyev Fondunun vitse-prezidenti, bir sıra beynəlxalq humanitar və ekoloji təşəbbüslərin müəllifi və təşəbbüskarı, ictimai və mədəni xadim Leyla İlham qızı Əliyeva doğum gününü qeyd edir.
1985-ci ildə Bakıda anadan olan Leyla Əliyeva 1989–2000-ci illərdə 160 saylı orta məktəbdə təhsil alıb. Orta məktəbi bitirdikdən sonra Avropa Biznes Məktəbində, daha sonra isə Moskva Dövlət Beynəlxalq Münasibətlər İnstitutunda magistr pilləsində təhsilini davam etdirib.
İctimai və humanitar fəaliyyətləri
- 2007-ci ildən Heydər Əliyev Fondunun Rusiya nümayəndəliyinin rəhbəri, 2011-ci ildən isə Fondun vitse-prezidentidir.
- “Xocalıya Ədalət” kampaniyasının təşəbbüskarı və əsas siması olaraq, 2008-ci ildən bu yana bu təşəbbüs çərçivəsində dünyada Xocalı soyqırımı haqqında həqiqətlərin tanıdılması məqsədilə genişmiqyaslı fəaliyyət göstərir.
- BMT-nin Ərzaq və Kənd Təsərrüfatı Təşkilatının (FAO) xoşməramlı səfiridir.
- IDEA İctimai Birliyinin təsisçisi və sədri kimi ekoloji mühitin qorunması, ağacəkmə kampaniyaları, “Bizim həyət” və “Məktəb bağları” kimi layihələrə rəhbərlik edir.
- Rusiyada yaşayan azərbaycanlı gəncləri birləşdirən AMOR təşkilatının rəhbəridir.
Mükafat və təltiflər
Leyla Əliyevanın fəaliyyəti aşağıdakı nüfuzlu mükafatlarla qiymətləndirilib:
- “Tərəqqi” medalı (2011)
- “Key to life” fəxri mükafatı (2011, Nyu-York)
- “Həştərxan vilayəti qarşısında xidmətlərə görə” medalı (2012)
- “Ekoloji mühitin qorunmasına görə” beynəlxalq mükafat (2013)
- BMT-nin FAO xoşməramlı səfiri statusu (2015)
- “Puşkin” medalı (2015)
- MGİMO-nun “Xidmətlərə görə” medalı (2016)
Yaradıcı fəaliyyəti
Leyla Əliyeva həm də yaradıcı şəxsiyyətdir. Şeir yazır, rəsmlər çəkir, “Əli və Nino” filminin icraçı prodüseri olmuş və “Bakı, mən səni sevirəm” kinolayihəsinə rəhbərlik edib.
O, bir çox hallarda doğum gününü qayğıya ehtiyacı olan uşaqların əhatəsində, humanitar layihələrə həsr edir. Sosial rifah, təhsil, səhiyyə və mədəniyyət layihələrinin dəstəklənməsi onun fəaliyyətinin əsas istiqamətlərindəndir.
Leyla Əliyeva üç övlad anasıdır – iki oğul və bir qız.
