Kondisioner işləmir, soyuducu soyutmur və ya kombidə nasazlıq yaranır. Belə hallarda əksər insanlar ustaya müraciət edir. Lakin bir çox hallarda sadə problem bahalı təmir kimi təqdim olunur və istehlakçı gözləmədiyi məbləğ ödəməli olur. Son dövrlər vətəndaşlar arasında “kiçik nasazlığa görə yüzlərlə manat ödəmişəm” kimi şikayətlərin sayı artmaqdadır.
Mütəxəssislər bildirirlər ki, məişət texnikasının təmiri bazarında şəffaflığın olmaması qiymət manipulyasiyalarına və istehlakçı hüquqlarının pozulmasına şərait yaradır. Xüsusilə texniki bilikləri olmayan şəxslər nasazlığın real səbəbini müəyyən edə bilmədikləri üçün təqdim edilən qiymətlə razılaşmağa məcbur qalırlar.
Qəbzsiz xidmət ən böyük risklərdən biridir
Azad İstehlakçılar Birliyinin sədri Eyyub Hüseynovun sözlərinə görə, bəzi ustalar xidmət haqqını işin həcmindən deyil, müştərinin imkanlarından çıxış edərək müəyyənləşdirirlər.
“Bəzi hallarda ustalar xidmət göstərdikdən sonra heç bir qəbz və ya sənəd təqdim etmirlər. Bu isə qanunvericiliyin tələblərinə ziddir. Sonradan eyni nasazlıq təkrar yaranarsa, istehlakçının həmin şəxsi tapması və hüquqlarını müdafiə etməsi çətinləşir”, – deyə o bildirib.
Ekspert qeyd edir ki, qeyri-rəsmi fəaliyyət göstərən şəxslərin sayı çox olduğundan vətəndaşların hüquqlarının qorunması da mürəkkəbləşir.
İstehlakçılar özlərini necə qoruya bilər?
Mütəxəssislər vətəndaşlara təmir xidmətindən istifadə edərkən daha diqqətli olmağı tövsiyə edirlər. Xüsusilə görülən işə görə rəsmi qəbz tələb olunmalı, mümkün olduqda xidmət göstərən şəxsin məlumatları saxlanmalıdır.
Eyyub Hüseynov hesab edir ki, xidmət sektorunda çalışan ustalar üçün sertifikatlaşdırma sistemi tətbiq olunmalıdır. Bu, həm peşəkarlığın artırılmasına, həm də istehlakçıların daha etibarlı xidmət almasına kömək edə bilər.
Onun fikrincə, bazarda şəffaflığın artırılması, sənədləşmənin məcburi xarakter daşıması və peşəkar nəzarət mexanizmlərinin gücləndirilməsi gələcəkdə bu sahədəki problemlərin azalmasına şərait yaradacaq.
