Bu gün Yerə təsir göstərə biləcək geomaqnit qasırğası gözlənilir. Günəşdə son günlər müşahidə olunan yüksək aktivlik nəticəsində kosmosa atılan plazma axınlarının Yer yaxınlığından keçəcəyi proqnozlaşdırılır.
Müşahidələrə əsasən, Günəş səthində adi C sinifli alışmalarla yanaşı, daha güclü M sinifli alışmalar və tac kütlə atılması qeydə alınıb. Məhz bu proseslər geomaqnit şəraitin dəyişməsinə səbəb olur.
Qasırğa günün ikinci yarısında başlayacaq
Proqnoza görə, saat 15:00-dan sonra Kp indeksi 5 səviyyəsinə yüksələcək və G1 kateqoriyalı geomaqnit qasırğası formalaşacaq. Bu vəziyyət iyunun 5-i səhər saatlarınadək davam edəcək.
Gecə saatlarında isə aktivliyin daha da artacağı gözlənilir. Xüsusilə saat 00:00-03:00 aralığında Kp indeksinin 6-ya çatacağı proqnozlaşdırılır ki, bu da maqnit sahəsində daha nəzərəçarpan dəyişikliklər deməkdir.
Geomaqnit aktivliyin Yerətrafı orbitdə fəaliyyət göstərən bəzi peyk və kosmik sistemlərin işinə təsir etməsi ehtimal olunur. Bununla belə, hazırkı proqnozlar ciddi təhlükədən xəbər vermir.
Məlumata görə, iyunun 5-i saat 09:00-dan sonra vəziyyət tədricən sabitləşəcək və geomaqnit fon yenidən sakit səviyyəyə qayıdacaq. Günəş aktivliyi isə müşahidə altında saxlanılır.
