Azərbaycanda oktyabrın 1-dən muzdlu işlə bağlı vahid bəyannamə təqdimatı tamamilə şəxsi kabinet üzərindən həyata keçiriləcək. İqtisadiyyat Nazirliyi yanında Dövlət Vergi Xidmətinin məlumatına görə, “Muzdlu işlə əlaqədar ödəmə mənbəyində tutulmalar üzrə vahid bəyannamə (hesabat)” forması, onun əlavələri və tərtibat qaydaları yeni redaksiyada təsdiqlənib.
Əvvəllər bu bəyannamə ayrı interfeys vasitəsilə təqdim olunurdu, digərləri isə vahid elektron kabinetdən göndərilirdi. İndi isə bütün bəyannamələr, o cümlədən muzdlu işlə bağlı olanlar, şəxsi kabinetə inteqrasiya edilərək eyni mənbədən təqdim olunacaq.
Bu yenilik sahibkarların inzibati yükünü azaldacaq, hesabat vermə prosesini sadələşdirəcək və vergi öhdəliklərinin vaxtında və daha rahat yerinə yetirilməsini təmin edəcək. Eyni zamanda rəqəmsal şəffaflıq və hesabatlılıq səviyyəsinin yüksəlməsinə səbəb olacaq.
Dövlət Vergi Xidməti bütün vergi ödəyicilərini “İnternet Vergi İdarəsi”nə (new.e-taxes.gov.az) daxil olaraq oktyabrın 1-dən yeni sistemdən istifadə etməyə dəvət edir. Yeni bəyannamə forması, əlavələri və doldurulma qaydaları ilə bu linkdən tanış olmaq mümkündür:
https://www.taxes.gov.az/az/page/beyanname-erize-formalari-arayis-hesabat-ve-qerarlar
