Böyük Britaniyanın Mersisayd bölgəsində yaşayan 45 yaşlı Pol Bouness öz imkanlarını yoxlamaq üçün qeyri-adi addım atıb. O, Panama sahillərinə yaxın yerləşən yaşayış olmayan adada üç gün tam təcrid vəziyyətində yaşayıb. Kişinin yanında nə hazır qida ehtiyatı, nə içməli su, nə də rahat yaşayış şəraiti olub.
Polun macərası Panama yaxınlığındakı Perl adalarından birində baş tutub. O bildirib ki, bu qərarı iş həyatındakı gərginlikdən sonra verib və sosial şəbəkələrdə “Desert Island Survival” proqramını gördükdən sonra layihəyə qoşulmağa qərar verib.
Sınaq başlamazdan əvvəl iştirakçılar beş günlük hazırlıq mərhələsindən keçiblər. Onlara balıq tutmaq, palma yarpaqlarından sığınacaq qurmaq, kokos toplamaq və təbii materiallardan ip hazırlamaq öyrədilib. Təlim zamanı bölgədə köpəkbalığı, zəhərli hörümçəklər və ilanların olduğu da iştirakçıların diqqətinə çatdırılıb.
İlk günlər daha ağır keçdi
Pol daha sonra adanın uzaq hissəsinə aparılıb. O, özü ilə əlavə su və ya rahatlıq yaradacaq əşyalar götürməyib. İlk işi palma yarpaqları və iri budaqlardan sığınacaq qurmaq olub.
İçməli su üçün əsas mənbə kokoslar idi. Qida tapmaq isə daha çətin olub. O, özünün hazırladığı nizə və sadə alətlərlə balıq tutmağa çalışıb. İlk gün yalnız bir balıq tuta bildiyini deyən Pol, yemək hazırlamağın belə uzun prosesə çevrildiyini bildirib.
İkinci gün isə vəziyyət daha da ağırlaşıb. Sahildə faydalı əşyalar axtararkən geri qayıdan Pol güclü qabarma nəticəsində sığınacağının dağıldığını görüb. Həmin gün heç bir balıq da tuta bilməyib və ac qalıb.
“Bir şey yolunda getməyəndə anlayırsan ki, tamamilə təksən və danışacaq heç kim yoxdur”, – deyə o bildirib.
Təcrübə onun həyata baxışını dəyişdi
Üçüncü gün Pol yenidən sığınacaq qurmağa nail olub. O, kokos qızardaraq yeyib və iki balıq tutub. Dördüncü gün isə xilasedici qayıqlar onu adadan götürüblər.
Britaniyalı iştirakçı bildirib ki, bu təcrübə ona gündəlik həyatda adi görünən su, yemək və təhlükəsiz ev şəraitinin əsl dəyərini anlamağa kömək edib. O, macəra zamanı həm də valideyn himayəsindən məhrum uşaqlara dəstək verən SOS Children’s Villages təşkilatı üçün 2368 funt sterlinq ianə toplamağı bacarıb.
Mütəxəssislər qeyd edirlər ki, belə sağqalma proqramları son illərdə dünyada daha populyarlaşır. İnsanlar bu layihələr vasitəsilə həm psixoloji dözümlülüklərini yoxlayır, həm də texnologiyadan uzaq həyatın necə olduğunu təcrübədən keçirirlər.
