Dünya şöhrətli rejissor Piter Cekson “Üzüklərin hökmdarı” kainatında daha bir yeni filmin çəkiləcəyini açıqlayıb. “Üzüklərin hökmdarı: Keçmişin kölgəsi” adlanacaq ekran əsərinin “Qollumun axtarışı” filmindən sonra təqdim olunacağı bildirilib.
Məlumata görə, rejissor bu barədə Warner Bros. studiyasının sosial şəbəkələrində yayımlanan video müraciətində danışıb. Cekson əvvəlcə Endi Serkisin rejissorluq edəcəyi və baş rolda çıxış edəcəyi “Qollumun axtarışı” layihəsinə toxunub, daha sonra isə franşizada növbəti film üzərində işlərin getdiyini açıqlayıb.
Yeni filmin süjeti və yaradıcı heyət
Yeni layihənin ideyası tanınmış media siması və yazıçı Stiven Kolbert tərəfindən irəli sürülüb. O, “The Late Show” proqramının aparıcısı olmaqla yanaşı, Tolkin yaradıcılığının böyük pərəstişkarı kimi tanınır. Kolbertin sözlərinə görə, film “Üzüklərin qardaşlığı” kitabında yer alan, lakin 2001-ci ildə çəkilmiş ekranlaşdırmaya daxil edilməyən hissələr əsasında hazırlanacaq.
Kolbert bildirib ki, o, bu ideyanı oğlu ilə müzakirə etdikdən sonra Piter Ceksonla əlaqə saxlayıb və artıq iki ilə yaxındır ki, layihə üzərində ssenarist Filippa Boyenslə birlikdə işləyirlər.
“Qollumun axtarışı” filmi ilə bağlı detallar
Franşizanın növbəti layihəsi olan “Qollumun axtarışı” filminin çəkilişlərinin 2026-cı ildə Yeni Zelandiyada başlaması planlaşdırılır. Bu məkan əvvəlki “Üzüklərin hökmdarı” və “Hobbit” filmlərinin də çəkildiyi əsas məkandır.
Filmin yaradıcı heyətində klassik trilogiyanın müəllifləri olan Piter Cekson, Fren Uolş və Filippa Boyens də yer alır. Endi Serkis yenidən Qollum obrazını canlandıracaq, Qendalf roluna isə yenidən İen MakKellen qayıdacaq.
Eyni zamanda, süjetdə Frodo personajının da yer alacağı təsdiqlənsə də, bu rolu yenidən Elayca Vudun canlandırıb-canlandırmayacağı hələlik açıqlanmayıb. Hadisələrin Frodo Rivendellə yola düşməzdən əvvəl baş verdiyi bildirilir. Hekayəyə əsasən, Qendalf Araqornu Qollumu tapmaq üçün xüsusi tapşırıqla göndərəcək.
Qeyd olunur ki, gənc Araqorn rolunda Viqqo Mortensen yox, daha gənc aktyorun – Leo Vudallın çıxış edəcəyi ehtimal edilir.
