Azərbaycan Prezidenti İlham Əliyevin Əmək Məcəlləsinə edilmiş dəyişiklikləri təsdiqləməsi ölkədə əməkhaqqı siyasətində yeni mərhələnin başlanğıcı kimi qiymətləndirilir.
Dəyişikliklərə əsasən, minimum əməkhaqqı məbləği hər il ən azı bir dəfə yenidən qiymətləndiriləcək və bu, onun dövri şəkildə artırılmasını qanunvericilik səviyyəsində təmin edəcək.
Minimum əməkhaqqının artımı kimlərə şamil olunur?
Millət vəkili Vüqar Bayramov sosial şəbəkədəki açıqlamasında bildirib ki, minimum əməkhaqqının mütəmadi artırılması yalnız az maaş alan işçilər üçün deyil, vahid tarif cədvəli (VTC) üzrə bütün dərəcələr üzrə maaşların yüksəlməsinə səbəb olacaq.
Deputat qeyd edib ki, dövlət büdcəsindən maliyyələşən sahələrdə çalışan və dövlət qulluqçusu statusu olmayan işçilərin aylıq vəzifə maaşları minimum əməkhaqqı artımından maksimum bir ay sonra yeni məbləğə uyğunlaşdırılacaq.
Bu sahələrə aşağıdakılar daxildir:
- sosial xidmət
- elm və təhsil
- mədəniyyət
- gənclər və idman
- kənd təsərrüfatı
- ekologiya və ətraf mühitin mühafizəsi
- mənzil-kommunal təsərrüfatı
- nəqliyyat və rabitə
- meliorasiya, su təsərrüfatı və balıqartırma sektoru
Hazırda VTC-də maaşlar 19 dərəcə üzrə müəyyənləşdirilir. Ən aşağı tarif 400 manat, ən yüksək isə 1 150 manat təşkil edir. Vüqar Bayramovun sözlərinə görə, minimum əməkhaqqının hər artırılması praktiki olaraq bütün dərəcələr üzrə maaşlara təsir edir.
Artımın təsir dairəsi genişlənir
Deputat əlavə edib ki, dəyişikliklər həm dövlət, həm də özəl sektorda maaş artımına səbəb olacaq, çünki qanunvericiliyə əsasən hər iki sektorda minimum əməkhaqqıdan aşağı maaş təklif etmək qadağandır.
Hesablamalara görə, minimum əməkhaqqının növbəti artımı təxminən 700 min vətəndaşın maaşında yüksəlişə gətirib çıxaracaq. Bu isə həm sosial rifahın yaxşılaşdırılması, həm də əmək bazarında stimullaşdırıcı təsir baxımından mühüm addım kimi qiymətləndirilir.
