Rusiya Prezidenti Vladimir Putin ABŞ-ın hazırkı lideri Donald Trampın Qrenlandiyanın ABŞ-a birləşdirilməsi ilə bağlı planlarını “ciddi niyyət” adlandırıb. O, bu barədə “Arktika – dialoq məkanı” beynəlxalq forumunda çıxışı zamanı danışıb. Daylinews-Az “RIA Novosti”yə istinadla xəbər verir ki, Putin məsələyə tarixi kontekstdən yanaşmağı tövsiyə edib.
“Burada ABŞ tərəfindən Qrenlandiya ilə bağlı ciddi planlardan söhbət gedir”, – deyə Putin qeyd edib. O əlavə edib ki, bu ideyanın əsası uzun illər əvvəllərə dayanır və sadəcə qeyri-ciddi bəyanat kimi qiymətləndirilməməlidir. Putinin sözlərinə görə, Vaşinqton yaxın gələcəkdə də Arktika və ətraf bölgələrdə öz maraqlarını irəli sürməyə davam edəcək.
Xatırladaq ki, bir neçə gün öncə Donald Tramp Qrenlandiyanın ABŞ üçün beynəlxalq təhlükəsizlik baxımından strateji əhəmiyyətə malik olduğunu vurğulamışdı. O, Qrenlandiya sakinlərinin bu birləşməyə hazır olub-olmadığını bilmədiyini, lakin “onları inandırmaq lazım olduğunu” qeyd etmişdi.
Tramp bu ideyanı ilk dəfə 2019-cu ildə gündəmə gətirmiş, lakin Danimarka hökuməti adanın satılmasının mümkün olmadığını bildirmişdi. Müzakirələr 2024-cü ilin dekabrında yenidən aktuallaşmış və Tramp Qrenlandiyanın “dünya azadlığı üçün açar nöqtə” olduğunu bəyan etmişdi. Danimarka hakimiyyəti isə yenidən məsələni qapadaraq, adanın satılmayacağını rəsmən təsdiqləmişdi.
