Martın 7-də SpaceX şirkəti Starship sisteminin səkkizinci buraxılışını həyata keçirdi. Əvvəlki sınaq kimi, bu dəfə də uçuş eyni ssenari üzrə davam etdi. Şirkət Super Heavy gücləndiricisini uğurla yerə endirməyə nail olsa da, Starship nəzarəti itirdi və qısa müddət sonra partladı.
123 metrlik raket planlaşdırıldığı kimi start meydançasından ayrıldı və yüksəlişə başladı. Super Heavy gücləndiricisi Starship-dən ayrıldıqdan sonra geriyə dönüş manevrini icra etdi və iki Raptor mühərrikinin sıradan çıxmasına baxmayaraq, Mechazilla qülləsinin manipulyatorları tərəfindən uğurla tutularaq yerə endirildi.
Lakin bu uğur SpaceX üçün təsəlli olmadı. Əvvəlki sınaqda olduğu kimi, Starship təyin olunmuş trayektoriyaya çıxmazdan bir neçə saniyə əvvəl bir neçə mühərrikdə nasazlıq baş verdi. İlkin ehtimallara görə, problem gəmidə baş verən yanğın nəticəsində yaranıb və bu, gəminin oriyentasiyasını itirməsinə və əlaqənin kəsilməsinə səbəb olub.
Qısa müddət sonra sosial şəbəkələrdə Starship-in partlamasını və atmosferə daxil olan qalıqlarını göstərən videolar yayıldı. Görünən odur ki, gəmi fövqəladə uçuş dayandırma sistemi vasitəsilə partladılıb. Oxşar hadisə əvvəlki buraxılışda da baş vermişdi – Super Heavy yerə qaytarılsa da, Starship Karib dənizi üzərində parlaq bir partlayışla məhv olmuşdu.
Hal-hazırda qəzanın dəqiq səbəbi məlum deyil. Lakin eyni ssenari üzrə iki ardıcıl uğursuzluq SpaceX üçün ciddi problemlər yaradır. Son iki buraxılışda şirkət böyük yanacaq çənləri və texniki yeniliklərə sahib yeni Starship versiyasını sınaqdan keçirirdi. Görünən odur ki, bu yeniləmə hələ tam mükəmməlləşdirilməyib və SpaceX mühəndisləri əvvəlki uğurları təkrarlamaq üçün konstruksiyada ciddi dəyişikliklər etməli olacaqlar.
