Tacikistanda Azərbaycan Mədəniyyəti Günləri çərçivəsində müxtəlif şəhərlərdə zəngin tədbirlər proqramı həyata keçirilir. Rəsmi açılış mərasimi və möhtəşəm qala-konsertin 20 may tarixində paytaxt Düşənbədə baş tutacağı bildirilir.
Tarix və incəsənətin vəhdəti
20 may tarixində Tacikistan Milli İncəsənət Muzeyində “Azərbaycanın bədii sərvətlərində yaşayan milli irs” adlı sərgi açılacaq. Sərginin əsas hissəsini, Prezident İlham Əliyevin sərəncamına əsasən yubileyi qeyd olunan görkəmli azərbaycanlı rəssam Mirzə Qədim İrəvaninin (1825–1875) 200 illiyinə həsr olunan “Mirzə Qədim İrəvani: Şərq və Qərb sənət üslublarının qovşağında” bölməsi təşkil edəcək. Bölmə Azərbaycan Milli İncəsənət Muzeyi tərəfindən hazırlanıb.
Sərgidə Azərbaycan Milli Xalça Muzeyinin xalça və parça kolleksiyaları, xalq sənət nümunələri, “Qarabağ: Milli irsin yaddaşı” adlı fotosərgi və moda nümayişi də təqdim olunacaq.
Qala-konsert və musiqi axşamları
Həmin gün axşam saatlarında Tacikistanın ən böyük mədəniyyət mərkəzlərindən olan “Kohi Borbad” konsert kompleksində Azərbaycan incəsənət ustalarının iştirakı ilə möhtəşəm qala-konsert keçiriləcək.
21 mayda Tacikistan Milli Kitabxanasında “Azərbaycan ədəbiyyatı guşəsi”nin açılış mərasimi planlaşdırılıb. Burada Azərbaycan və Tacikistan milli kitabxanaları arasında əməkdaşlığa dair memorandum da imzalanacaq.
Regional səslər və mədəniyyət körpüləri
Eyni gün paytaxtdan 110 km məsafədə yerləşən Danqara şəhərində Azərbaycan qədim musiqi alətləri ansamblının çıxışı nəzərdə tutulub. Tədbirlər silsiləsi Düşənbədəki Tacikistan Milli Konservatoriyasında təşkil olunacaq etno-caz konserti ilə başa çatacaq.
Mədəni körpülərin tarixi
Qeyd edək ki, Tacikistanda Azərbaycan Mədəniyyəti Günləri ilk dəfə 2008-ci ildə, Azərbaycanda isə Tacikistan Mədəniyyəti Günləri 2007-ci ildə təşkil olunub. Sonuncu dəfə Tacikistan mədəniyyətinə həsr olunmuş tədbirlər 2024-cü ilin may ayında Bakı və Gəncə şəhərlərində keçirilib.
