ABŞ Prezidenti Donald Tramp, Rusiya Prezidenti Vladimir Putinlə görüşünü Səudiyyə Ərəbistanında keçirmək niyyətində olduğunu açıqlayıb. Daylinews-Az xəbər verir ki, CBS News kanalına danışan Tramp Putinin sülh istədiyini vurğulayıb.
Tramp və Putin arasında telefon danışığı
12 fevral tarixində Tramp və Putin arasında təxminən 1,5 saat davam edən telefon danışığı baş tutub. Liderlər aşağıdakı mövzuları müzakirə ediblər:
- ABŞ və Rusiya arasında məhbus mübadiləsi
- Ukraynada münaqişənin həlli
- Uzunmüddətli sülh danışıqları
Kremlin mətbuat katibi Dmitri Peskov açıqlamasında Putinin Trampı Moskvaya rəsmi səfərə dəvət etdiyini bildirib.
Çin Tramp və Putin görüşünə ev sahibliyi etmək istəyir
The Wall Street Journal (WSJ) nəşrinin məlumatına görə, Çin rəhbərliyi Tramp və Putin arasında görüşün Pekində keçirilməsini təklif edib. Çin rəsmiləri vasitəçilər vasitəsilə bu təklifi ABŞ prezidentinin komandası ilə müzakirə ediblər. Pekin bu addımla dünya arenasında Ukrayna münaqişəsinin həllində vasitəçi rolunu oynamaq istəyir.
Lakin ABŞ və Avropa ölkələri bu təklifə ehtiyatla yanaşır, çünki Rusiya ilə Çinin yaxın əlaqələrindən narahatdırlar. WSJ yazır ki, Ukrayna Prezidenti Volodimir Zelenski bu görüşə dəvət edilməyəcək. Ağ Evdəki mənbə belə bir görüşün “real olmadığını” bildirib. Çin isə Trampla daha sıx əlaqələr qurmaq və ticarət rüsumlarına dair aparılan müzakirələri yumşaltmaq üçün bu görüşün keçirilməsində maraqlıdır.
