13 oktyabr səhəri Çinin Çendu şəhərində Xiaomi SU7 elektromobili yol kənarındakı maneəyə çırpılaraq bir saniyə ərzində alovlandı. Yoldan keçənlər sürücünü xilas etməyə çalışdılar: şüşələri sındırdılar, qapıları açmağa cəhd etdilər, lakin mexaniki tutacaqların olmaması və elektron qıfılların enerji kəsildikdən sonra bloklanması səbəbindən uğur qazana bilmədilər.
Hadisə yerinə gələn yanğınsöndürənlər avtomobilin gövdəsini elektrik mişarları ilə kəsməyə başladılar, lakin artıq gec idi – sürücü diri-diri yandı.
Qəza xəbərindən sonra Xiaomi-nin Honq Konq birjasındakı səhmləri təxminən 10% ucuzlaşdı, bu, 2025-ci ilin aprel ayından bəri ən böyük eniş oldu.
Bu, SU7 ilə bağlı ilk faciəli hadisə deyil: martda bu elektromobilin iştirak etdiyi qəzada üç nəfər həyatını itirdi. Sentyabrda isə Xiaomi sürücüyə yardım sistemindəki problemlərə görə təxminən 120 min SU7 elektromobili geri çağırdı.
Xiaomi SU7 Ultra 2024-cü ilin payızında təqdim edildi və 2025-ci ilin əvvəlində satışa çıxdı. Avtomobil üç elektromotorla təchiz olunub, ümumi gücü 1,1 min kVt təşkil edir və 0-dan 100 km/saat sürətə 1,98 saniyədə çata bilir.
