ABŞ prezidenti Donald Tramp, Ukrayna prezidenti Volodimir Zelenski və ABŞ-ın vitse-prezidenti Cey Di Vens Vaşinqtonda keçirilən mətbuat konfransı zamanı mübahisə ediblər.
Zelenski 2014-cü ildən etibarən Rusiyanın təcavüzünü heç kimin dayandıra bilmədiyini vurğuladıqda, Vens buna etiraz edərək, Ukraynanın mobilizasiya ilə bağlı problemlərinin olduğunu və Trampa təşəkkür etməli olduğunu bildirdi. O, Trampın Ukraynanın “məhv olmasının qarşısını almağa çalışdığını” vurğuladı.
Buna cavab olaraq, Zelenski Vensi Ukraynaya dəvət etdi və tərəflər arasında gərgin müzakirə baş verdi. Tramp da bu dialoqa müdaxilə edərək, ABŞ-ın müharibədən təsirlənmədiyini və Ukraynanın “çox da yaxşı vəziyyətdə olmadığını” söylədi. O, Zelenskini ABŞ-dan aldığı 350 milyard dollarlıq yardımı qiymətləndirməyə çağırdı və “əgər ABŞ-ın silah yardımı olmasaydı, müharibə cəmi bir neçə həftəyə bitərdi” dedi.
Vens isə Zelenskini ABŞ-ın vitse-prezidenti Kamala Harris-in seçki kampaniyasında iştirak etməkdə ittiham etdi. Tramp, Ukraynanın “Üçüncü Dünya Müharibəsi ilə oynadığını” və Zelenskinin ABŞ-a qarşı “hörmətsizlik göstərdiyini” iddia etdi. Mübahisənin sonunda Tramp Zelenskidən Ağ Evi tərk etməsini istədi.
Zelenskinin Fox News-a verdiyi müsahibə
Görüşdən sonra Zelenski ABŞ-ın Fox News kanalına müsahibə verib. O, Trampdan üzr istəmək niyyətində olmadığını bildirib:
“Mən prezidentə və Amerika xalqına hörmət edirəm. Ancaq biz heç bir səhv etməmişik,” – deyə Zelenski vurğulayıb.
Ukrayna prezidenti Tramp və Venslə olan gərgin dialoqdan məyus olduğunu qəbul etsə də, bu görüşün Ukrayna və ABŞ münasibətləri çərçivəsində qiymətləndirilməli olduğunu qeyd edib.
“Mən Trampa və ABŞ xalqına minnətdaram. Onların dəstəyi sayəsində sağ qalırıq. ABŞ-ın dəstəyi olmadan bizim üçün çətin olacaq. Buna görə də buradayam,” – deyə Zelenski bildirib.
O, ABŞ-ın Ukraynaya daha çox hərbi dəstək verməsini gözlədiyini, lakin hazırda yeni yardım paketlərinin verilmədiyini vurğulayıb.
Ukrayna üçün sülh və təhlükəsizlik zəmanətləri
Zelenski bildirib ki, Ukrayna sadəcə atəşkəs deyil, uzunmüddətli sülh istəyir. O, ABŞ-ın təhlükəsizlik zəmanətləri təqdim etməsi halında Rusiyayla danışıqlara açıq olduğunu qeyd edib.
“Biz sülh istəyirik, amma bu, sadəcə müharibənin bitməsi anlamına gəlmir,” – deyə Zelenski ABŞ-ın keçmiş prezidenti Ronald Reyqanın fikirlərini sitat gətirib.
O, Ukrayna xalqının döyüşməyə davam edəcəyini, çünki Rusiyanın istənilən an geri qayıda biləcəyindən qorxduqlarını vurğulayıb.
Tramp isə Zelenskinin müharibəni davam etdirmək istədiyini iddia edib və bildirib ki, ABŞ-ın iştirakı Ukraynaya danışıqlarda üstünlük qazandırır.
Trampın yekun bəyanatı
Tramp görüşün sonunda açıqlama verərək bildirib ki, Zelenski ABŞ-ın müharibədə iştirakına güvəndiyi üçün sülhə hazır deyil.
“Mənə üstünlük lazım deyil, mənə SÜLH lazımdır. O, ABŞ-ı Ağ Evdə hörmətsiz etdi. O, sülhə hazır olduğu zaman yenidən gələ bilər,” – deyə Tramp qeyd edib.
Zelenskinin son paylaşımı
Zelenski daha sonra X (keçmiş Twitter) platformasında paylaşım edərək ABŞ-a təşəkkür edib:
“Təşəkkürlər, Amerika! Dəstəyə görə təşəkkürlər! Prezidentə, Konqresə və Amerika xalqına təşəkkür edirəm. Ukraynanın ədalətli və uzunmüddətli sülhə ehtiyacı var və biz məhz bunun üçün çalışırıq.”
