SSRİ, Gürcüstan və Rusiya incəsənətində dərin iz buraxmış məşhur heykəltəraş və rəssam Zurab Tsereteli 92 yaşında vəfat edib. O, uzun müddət davam edən xəstəlikdən sonra ailəsinin yanında dünyasını dəyişib.
Bu barədə tanınmış sənətşünas Kseniya Korobeynikova Telegram kanalında məlumat yayıb. O, Tseretelini belə xarakterizə edib: “Böyük sənətkar. Böyük insan. Böyük vətəndaş. Böyük xeyriyyəçi. Onun nailiyyətləri saysızdır”.
Zurab Tsereteli yaradıcılıq irsinə 5 minə yaxın əsər daxildir. O, yalnız rəssam kimi deyil, həm də monumental dekorativ sənətdə (freskalar, mozaikalar, panolar) əvəzolunmaz imza sahibidir.
Heykəltəraş kimi o, bir çox tanınmış abidələrin müəllifidir. Onların arasında:
- “Əbədi dostluq” — Moskva
- “Xeyirin Şər üzərində qələbəsi” — BMT-nin Nyu-Yorkdakı qərargahı qarşısında
- “Yeni insanın doğuluşu” — Sevil şəhərində
- “Etimadsızlıq divarını dağıt” — London
Bundan başqa, Tsereteli aşağıdakı iri obyektlərin bədii tərtibatını həyata keçirmişdir:
- Ulyanovsk şəhərindəki Lenin memorialı
- İsmayılovodakı mehmanxana kompleksi
- Krımda yerləşən “Yalta-İnturist” oteli
- Soçidəki “Riviyera” parkı
- Tbilisidəki Həmkarlar İttifaqı Sarayı
- Moskvadakı Böyük Teatrın Yeni Səhnəsi
Zurab Tsereteli həm sənət, həm də mədəniyyət tarixində parlaq sima kimi yadda qalacaq. Onun mirası gələcək nəsillər üçün əvəzsiz ilham mənbəyi olacaq.
