Səudiyyə Ərəbistanında Ramazan hilalının müşahidə edildiyi elan olunduqdan sonra bir sıra ölkələrdə müqəddəs Ramazan ayı bu gündən etibarən başlayıb. Milyonlarla müsəlman artıq ilk oruc gününü tutur.
Səudiyyə Ərəbistanı Ali Məhkəməsi hilalın göründüyünü təsdiqləyərək Ramazanın ilk gününün başladığını bəyan edib. Bu qərardan sonra bir neçə ölkə də eyni tarixdə oruca start verildiyini açıqlayıb.
Ramazana bu gündən başlayan ölkələr arasında Qətər, Birləşmiş Ərəb Əmirlikləri, Yəmən, Fələstin, Küveyt, Bəhreyn və Livan yer alır. Şimali Afrika regionunda isə Mərakeş, Tunis və Əlcəzair, eləcə də Əfqanıstan Ramazanın başladığını elan ediblər.
Bəzi ölkələr sabahdan oruc tutacaq
Digər ölkələrdə isə hilalın görünməməsi səbəbindən Ramazan ayına fevralın 19-dan etibarən başlanacağı bildirilib. Türkiyə, Misir, Suriya, İordaniya, Oman, İndoneziya, Malayziya, Bruney, Tayland, Avstraliya və İraq sabahdan oruc tutacaqlarını açıqlayıblar.
Tarix fərqliliyi ayın müəyyənləşdirilməsi metodlarından qaynaqlanır. Bəzi ölkələr hilalın adi gözlə müşahidəsini əsas götürür, digərləri isə astronomik hesablamalara üstünlük verirlər. Bu səbəbdən Ramazanın başlanma günü regiondan-regiona dəyişə bilər.
Ramazan ayı müsəlmanlar üçün oruc, ibadət və mənəvi təmizlənmə dövrü hesab olunur. Bu müddət ərzində gün doğandan gün batana qədər qida və sudan imtina edilir, eyni zamanda yardımlaşma və xeyriyyəçilik ənənələri güclənir.
