Dominikan Respublikasında güclü “Melissa” qasırğası nəticəsində su təchizatı ciddi ziyan çəkib, ölkədə 1 milyon 270 mindən çox sakin içməli sudan məhrum olub. Fövqəladə İdarəetmə Mərkəzinin açıqlamasına görə, qasırğa ölkənin 63 su təminat sistemini sıradan çıxarıb, nəticədə onlarla yaşayış məntəqəsində içməli su qıtlığı yaranıb.
Mərkəzin rəhbəri Xuan Manuel Mendez bildirib ki, təbii fəlakət nəticəsində 260-dan çox ev zədələnib və təxminən 1400 nəfər evsiz qalıb. Qasırğa güclü külək, intensiv yağışlar və böyük dalğalarla müşayiət olunub, bölgədə ağaclar aşıb, torpaq sürüşmələri baş verib.
Kuba Meteorologiya İnstitutunun məlumatına görə, “Melissa” qasırğası Yamaykanın cənubuna doğru hərəkət edir və ərazidə təhlükə səviyyəsi artır. Hakimiyyət orqanları artıq paytaxt Kinqston da daxil olmaqla bir sıra rayonların boşaldıldığını elan edib. Təbii fəlakət “Saffir–Simpson” şkalası üzrə 4-cü kateqoriyaya çataraq, region üçün ciddi təhlükə mənbəyinə çevrilib.
