Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidməti (ETX) açıqlayıb ki, qlobal “Cloudflare” infrastrukturunda yaranan müvəqqəti fasilələr Azərbaycanda bu xidmətdən istifadə edən bir çox veb-resursun işinə mane oldu. Problemin əsas səbəbi “Aisuru botnet”in son günlərdə həyata keçirdiyi rekord həcmli DDoS hücumları oldu. Cloudflare 29,7 Tbps gücündəki bu hücumu neytrallaşdırmağa çalışarkən qlobal trafikin dalğalanması lokal saytların əlçatanlığına qısa müddətli təsir etdi.
ETX vurğulayıb ki, “Aisuru” botneti 1-4 milyon zərərli IoT cihazından ibarət şəbəkədir və 2025-ci ildə 2867 hücumdan 1304-ü üçüncü rübündə baş vermişdir. Bu hücumlar telekom, oyun, hosting və maliyyə şirkətlərini hədəf alır, .su domenlərindən idarə olunur. Cloudflare 2025-ci ildə 8,3 milyon DDoS hücumunu bloklamışdır ki, bu da əvvəlki rübə görə 15%, illik isə 40 faiz artımdır. Azərbaycanda AzStateNet və gov.az domenləri bu fasilədən təsirlənməyib.
Xidmətlər hazırda tam bərpa edilib və sabit işləyir. ETX ölkədə 9000-dən çox saytın Cloudflare fasiləsindən təsirləndiyi 18 noyabr hadisəsini xatırladaraq, yerli rəqəmsal həllərin inkişafını və xarici xidmətlərdən asılılıq azaltılmasını tövsiyə edir. Dövlət qurumlarının 457-si AzStateNet-ə keçib və TIMS tətbiqi WhatsApp alternativ kimi istifadə olunur.
