Çində humanoid robotların iştirakı ilə keçirilən beynəlxalq döyüş turniri rəsmən başlayıb. “Ultimate Robot Knockout Legend” adlı bu müsabiqə müxtəlif ölkələrdən olan komandalara öz android modellərini real döyüş şəraitində sınaqdan keçirmək imkanı yaradır. Yarış artıq həm texnologiya, həm də döyüş idmanı həvəskarlarının diqqətini cəlb edib.
Turnirin formatı və mükafat fondu
Məlumata görə, turnirdə dünyanın aparıcı universitetləri, elmi-tədqiqat mərkəzləri və yüksək texnologiya şirkətləri iştirak edir.
Komandalar öz istehsalı olan humanoid robotlarla döyüş meydanına çıxır və qalib gələn iştirakçıya dəyəri 10 milyon yuan – təxminən 2,5 milyon manat olan qızıl çempionluq kəməri təqdim ediləcək. Tədbir həmçinin məşhurlar tərəfindən də böyük maraqla qarşılanıb.
Tanınmış tay boksçusu Buakaw Banchamek “EngineAI” şirkətinin hazırladığı T800 model humanoid robotla nümunəvi döyüş keçirərək yarışa xüsusi rəng qatıb. Bu nümayiş çıxışı android döyüşlərinin nə dərəcədə real və dinamik ola biləcəyini göstərib.
Ekspertlər hesab edir ki, bu cür turnirlər yaxın illərdə robot texnologiyalarının inkişafına ciddi təkan verəcək. Həm mühəndislik sahəsində rəqabəti artırması, həm də tətbiqi süni intellektin potensialını ortaya çıxarması baxımından yarışın böyük əhəmiyyət daşıdığı vurğulanır.
