Göyçay rayonunun İkinci Ərəbcəbirli kəndində uzun müddətdir gözlənilən içməli su layihəsinin icrası başa çatıb. Dövlət Su Ehtiyatları Agentliyinin məlumatına görə, görülən işlər kənd sakinlərinin dayanıqlı və təhlükəsiz içməli suya çıxışını təmin etməyə yönəlib.
Hazırda 1 384 nəfərin yaşadığı İkinci Ərəbcəbirli kəndində bu vaxta qədər suya çıxış əsasən ictimai bulaqlar vasitəsilə təşkil olunurdu.
Mərkəzləşdirilmiş su təchizatının qurulması məqsədilə kənd daxilində diametri 40–110 mm arasında dəyişən borularla ümumilikdə 8,5 km uzunluğunda yeni su xətti çəkilib.
Bundan əlavə, su itkilərinin qarşısını almaq və istifadə uçotunu dəqiq aparmaq üçün 300 fərdi yaşayış evinin girişinə su sayğacları quraşdırılıb. Nəticədə kənd əhalisi Göyçay şəhərinin mövcud su infrastrukturuna qoşularaq daha sabit və fasiləsiz su təchizatı əldə edib.
Göyçayda su təminatı genişləndirilir
Agentliyin məlumatına əsasən, Göyçay rayonunda hazırda 23 kəndə su təchizatı xidməti göstərilir. Eyni zamanda, 18 kənd modul tipli su təmizləyici qurğular vasitəsilə su ilə təmin olunur. Rayon üzrə xidmət göstərilən ümumi abonent sayı 11 958-dir.
Layihə “Su ehtiyatlarından səmərəli istifadənin təmin edilməsinə dair Milli Strategiya” çərçivəsində həyata keçirilib və bölgədə su təsərrüfatının yaxşılaşdırılmasına mühüm töhfə verib. Bu ilin planlarına Müskürlü kəndində mərkəzləşdirilmiş su sisteminin qurulmasına başlamaq da daxildir.
