Yunanıstanın hüquq-mühafizə orqanları Krit adasında yerləşən NATO hərbi bazasını və ABŞ Hərbi Dəniz Qüvvələrinə məxsus “USS Gerald R. Ford” aviadaşıyıcısını müşahidə etməkdə şübhəli bilinən Azərbaycan əsilli Gürcüstan vətəndaşını saxlayıb.
Yerli KİV-in yaydığı məlumata görə, 36 yaşlı kişi Yunanıstanın Milli Kəşfiyyat Xidmətinin (EYP) xüsusi bölməsi tərəfindən təxminən bir ay ərzində izlənilib.
O, Afina şəhərində yerləşən Elefterios Venizelos adına Beynəlxalq Hava Limanında ölkəni tərk etməyə cəhd göstərərkən saxlanılıb.
Bir ay davam edən müşahidə
Məlumata əsasən, saxlanılan şəxs bir müddət Krit adasında olub və burada yerləşən strateji hərbi obyektlərin görüntülərini əldə edib.
Onun xüsusilə NATO bazasının ətrafını və ABŞ-ın “USS Gerald R. Ford” aviadaşıyıcısının fəaliyyətini izlədiyi bildirilir. Şübhəli şəxsin hərbi gəmilərin hərəkəti ilə bağlı məlumat topladığı da qeyd olunur. Saxlanıldıqdan sonra adı açıqlanmayan şəxs Milli Kəşfiyyat Xidmətinin qərargahına aparılıb.
Hazırda hadisə ilə bağlı araşdırmalar davam etdirilir və hüquq-mühafizə orqanları mümkün təhlükəsizlik risklərini qiymətləndirir. “USS Gerald R. Ford” ABŞ-ın ən müasir aviadaşıyıcılarından biri hesab olunur və NATO çərçivəsində müxtəlif əməliyyatlarda iştirak edir.
Krit adasında yerləşən hərbi obyekt isə region üçün strateji əhəmiyyət daşıyır. Hadisə Yunanıstanda təhlükəsizlik məsələlərinə diqqətin artdığı bir dövrdə baş verib. Rəsmi qurumlar əlavə detallar barədə hələlik geniş açıqlama verməyiblər.
