Azərbaycanlı rejissor Fariz Əhmədovun çəkdiyi “Səssizlikdə addımlar” adlı tammetrajlı sənədli film nüfuzlu beynəlxalq kino tədbirində təqdim olunacaq. Ekran əsərinin dünya premyerası Avropanın ən qədim festivallarından biri sayılan 66-cı Krakov Kino Festivalının əsas müsabiqə proqramında baş tutacaq.
Bu festival həm “Oskar” mükafatına, həm də Avropa Kino Akademiyasının mükafatlarına seçmə statusu ilə tanınır. Bu baxımdan filmin əsas müsabiqəyə daxil edilməsi Azərbaycan kinosu üçün mühüm uğur kimi qiymətləndirilir.
Minatəmizləmə mövzusu sənədli filmdə
Film azad olunmuş ərazilərdə aparılan minatəmizləmə prosesinə həsr olunub. Bu fəaliyyət çox vaxt “ikinci müharibə” kimi xarakterizə edilir, çünki təhlükə görünməzdir və hər an baş verə bilər. Ekran əsərində bu mürəkkəb və riskli işin insan həyatı üçün nə qədər önəmli olduğu göstərilir.
Filmin əsas qəhrəmanları isə yalnız qadınlardan ibarət olan minatəmizləmə qrupudur. Kamera onların gündəlik fəaliyyətini yaxından izləyir və ağır şəraitdə çalışan bu insanların həm peşəkar, həm də emosional tərəflərini üzə çıxarır.
Layihənin yaradıcı heyətində tanınmış mütəxəssislər yer alır. Filmin baş prodüseri Bakı Media Mərkəzinin rəhbəri Arzu Əliyeva, icraçı prodüseri isə polşalı Vita Yelakeviçdir. Layihə Azərbaycan və Polşa tərəfdaşlarının birgə əməkdaşlığı nəticəsində ərsəyə gəlib.
Film Bakı Media Mərkəzi, Drygas Film Production və Polşa Televiziyasının iştirakı ilə hazırlanıb. Layihəyə Azərbaycan Mədəniyyət Nazirliyi, Kino Agentliyi və Polşa Kino İnstitutu tərəfindən dəstək göstərilib.
