Azərbaycan Şahmat Federasiyasının növbəti hesabat konfransı keçirilib. Tədbirdə federasiyanın ötən il ərzində gördüyü işlər, ölkə şahmatının inkişaf istiqamətləri və gələcək layihələr müzakirə olunub.
Konfrans Dövlət Himninin səsləndirilməsi ilə başlayıb. Daha sonra Azərbaycanın ərazi bütövlüyü uğrunda şəhid olan hərbçilərin və hesabat dövründə vəfat edən şahmat ictimaiyyəti nümayəndələrinin xatirəsi bir dəqiqəlik sükutla yad edilib.
İl ərzində görülən işlər təqdim olundu
Tədbirdə çıxış edən Azərbaycan Şahmat Federasiyasının prezidenti Mahir Məmmədov iştirakçıları salamlayaraq federasiyanın son illərdə həyata keçirdiyi layihələrdən danışıb. Gənclər və idman naziri Fərid Qayıbov isə Azərbaycan şahmatçılarının beynəlxalq arenadakı uğurlarını xüsusi vurğulayıb.
Konfrans çərçivəsində 2025-ci ilin yekun hesabatı təqdim olunub və il ərzində ölkədə təşkil edilən yarışlar barədə məlumat verilib. Hesabat dövründə müxtəlif yaş qrupları üzrə Azərbaycan çempionatları, rapid və blits turnirləri, Respublika Şahmat Olimpiadası və beynəlxalq yarışlar keçirilib.
“Chess Tour Azerbaijan” layihəsi çərçivəsində baş tutan “Baku Open”, “Sheki Open”, “Shamakhi Open”, “Lankaran Open”, “Guba Open”, “Ganja Open” və “Shirvan Open” turnirləri də hesabatda xüsusi qeyd olunub.
Yeni loqo və sayt təqdim edildi
Tədbir zamanı federasiyanın yenilənmiş loqosu və yeni rəsmi veb-saytı da ictimaiyyətə təqdim edilib. AŞF nümayəndələri bildiriblər ki, yeni rəqəmsal platforma şahmatsevərlərin məlumatlara daha rahat çıxışını təmin edəcək.
Federasiyanın müfəttişi Rauf Hacılı 2025-ci ilin büdcə hesabatını təqdim edib. Müzakirələrdən sonra hesabat təsdiqlənib, eyni zamanda 2026-cı il üçün nəzərdə tutulan büdcə planı barədə də məlumat verilib.
Konfransın sonunda gələcək beynəlxalq layihələr və Azərbaycan şahmatının inkişaf strategiyası ətrafında fikir mübadiləsi aparılıb.
