Böyük bəstəkar Üzeyir Hacıbəylinin ölməz əsəri olan “Leyli və Məcnun” operası yenidən səhnəyə qoyulub. Bu dəfə tamaşa Bakıdakı Heydər Əliyev Sarayında təqdim olunub və tamaşaçıların böyük marağına səbəb olub. Səhnəarxası hazırlıq prosesi də diqqət mərkəzində olub və yaradıcı heyətin işi xüsusi reportajda işıqlandırılıb.
Yeni quruluşda diqqət çəkən əsas məqamlardan biri əsərin məkan baxımından fərqli interpretasiyasıdır. Quruluşçu rejissor Nicat Kazımov bildirib ki, bu dəfə hadisələr ənənəvi təsəvvürlərdən fərqli olaraq Ərəbistan səhralarında deyil, məhz Azərbaycan mühitində təqdim olunur. Onun sözlərinə görə, tamaşada beş yeni iştirakçı yer alır və bu, layihəyə əlavə dinamika qatır.
Gənc ifaçılar üçün yeni mərhələ
Operada əsas rolları gənc ifaçılar canlandırır. Leyli obrazını Aytən Məhərrəmova, Məcnun rolunu isə Fuad Əzizadə ifa edir. Məcnun rolunu ilk dəfə səhnədə canlandıracaq Fuad Əzizadə bu məsuliyyətli çıxış öncəsi həyəcanını gizlətməyib: “Bu rol mənim üçün yenidir və böyük məsuliyyət tələb edir. Ümid edirəm ki, tamaşa uğurla başa çatacaq”.
Tamaşanı izləyənlər arasında Xalq artisti, tanınmış xanəndə Mənsum İbrahimov da olub. O, çıxışında tələbələrinə dəstəyin vacibliyini vurğulayıb: “Səhnədə çıxış edən gənclərə baxanda qürur duyuram. Onları izləyir, ruhlandırır və dəstək oluruq. İstedadlı gənclərə hər zaman yol açmaq lazımdır”.
Qeyd edək ki, “Leyli və Məcnun” təkcə Azərbaycan operasının ilk nümunəsi deyil, həm də milli musiqi irsinin ən dəyərli incilərindən biri hesab olunur. Yeni səhnə quruluşu isə klassik əsərə fərqli baxış təqdim etməklə yanaşı, gənc ifaçıların inkişafı üçün də mühüm platforma yaradır.
