Bakıda nəqliyyat sıxlığının azaldılması məqsədilə yeni mexanizmin tətbiqi nəzərdən keçirilir. Paytaxtda və ətraf ərazilərdə yol hərəkətinin daha səmərəli təşkili üçün dövlət qurumları, təhsil və səhiyyə müəssisələri, eləcə də bəzi digər təşkilatlarda dəyişkən iş rejiminin tətbiqi gündəmdədir.
Məsələ ilə bağlı açıqlama verən Milli Məclisin deputatı Vüqar Bayramov bildirib ki, bu yanaşma “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı”nda öz əksini tapıb. Məqsəd səhər və axşam saatlarında müşahidə olunan nəqliyyat yükünü azaltmaq və şəhərdaxili hərəkəti daha rahat etməkdir.
Hansı qurumlarda tətbiq olunacağı araşdırılır
Deputatın sözlərinə görə, dəyişkən iş qrafikinin tətbiqi ilə bağlı təhlillər artıq yekun mərhələyə yaxınlaşıb. Bu istiqamətdə Əmək və Əhalinin Sosial Müdafiəsi Nazirliyi, Elm və Təhsil Nazirliyi, Səhiyyə Nazirliyi, TƏBİB və Nəqliyyatı Əlaqələndirmə Şurası tərəfindən qiymətləndirmələr aparılır.
Araşdırmalar tamamlandıqdan sonra yeni iş rejiminin tətbiq ediləcəyi qurumların siyahısı Nazirlər Kabineti tərəfindən təsdiqlənəcək. Planlaşdırılan modelə əsasən, müxtəlif təşkilatlarda iş gününün başlama saatları fərqli olacaq ki, bu da pik saatlarda sərnişin və avtomobil axınının bölüşdürülməsinə imkan yaradacaq.
Avropa təcrübəsi nümunə göstərilir
Vüqar Bayramov bildirib ki, dəyişkən iş qrafiki modeli Avropanın bir sıra ölkələrində artıq tətbiq olunur və müsbət nəticələr verir. Onun sözlərinə görə, iş saatlarının fərqli vaxtlarda başlaması səhər və axşam pik saatlarında nəqliyyat yükünün azalmasına kömək edir.
Deputat qeyd edib ki, bu mexanizm paytaxtda tıxac problemini tam aradan qaldırmayacaq. Bununla belə, o hesab edir ki, dəyişkən iş rejiminin tətbiqi nəqliyyat sıxlığının azaldılması istiqamətində mühüm addımlardan biri ola bilər. Eyni zamanda, yol infrastrukturunun inkişaf etdirilməsi və əlavə nəqliyyat layihələrinin həyata keçirilməsi də aktual olaraq qalır.
