Ermənistanda keçirilən parlament seçkilərinin yekun nəticələri hakim “Vətəndaş Müqaviləsi” Partiyasının növbəti dəfə qələbə qazandığını göstərib. Mərkəzi Seçki Komissiyasının açıqladığı yekun məlumata əsasən, Baş nazir Nikol Paşinyanın rəhbərlik etdiyi siyasi qüvvə səslərin 49,81 faizini toplayaraq parlamentdə ən böyük fraksiya statusunu qoruyub.
100 faiz seçki bülleteninin emalından sonra məlum olub ki, “Vətəndaş Müqaviləsi” Partiyasına 727 min 160 seçici səs verib. Beləliklə, Paşinyanın komandası seçkilərdə ən yaxın rəqiblərini xeyli qabaqlayaraq birinci yeri tutub.
Müxalifət ikinci və üçüncü yerləri bölüşdü
Seçkilərdə əsas müxalif qüvvələrdən biri olan iş adamı Samvel Karapetyanın rəhbərlik etdiyi “Güclü Ermənistan” bloku 23,29 faiz səs toplayıb. Keçmiş prezident Robert Köçəryanın liderlik etdiyi “Ermənistan” bloku isə 9,94 faiz nəticə ilə üçüncü sırada qərarlaşıb.
Səsvermənin ilkin mərhələlərində də hakim partiya üstünlüyünü qoruyurdu. Bülletenlərin yarıdan çoxu sayıldıqdan sonra “Vətəndaş Müqaviləsi”nin göstəricisi 51 faizdən yuxarı olub. Sonrakı mərhələlərdə bu rəqəm bir qədər azalsa da, partiya liderliyini itirməyib.
Ermənistan qanunvericiliyinə görə, partiyaların parlamentə düşməsi üçün 4 faiz, siyasi blokların isə 8 faiz seçki baryerini keçməsi tələb olunur. Bu səbəbdən bir sıra siyasi qüvvələr qanunverici orqanda təmsilçilik hüququ əldə edə bilməyib.
Paşinyan qələbəni erkən elan etmişdi
Səsvermənin nəticələri tam açıqlanmamışdan əvvəl Nikol Paşinyan sosial şəbəkə hesablarında partiyasının seçkilərdə qalib gəldiyini bəyan etmişdi. Son nəticələr onun açıqlamasını təsdiqləyib.
Seçici fəallığı da diqqət çəkib. Rəsmi məlumatlara görə, parlament seçkilərində iştirak səviyyəsi 58,97 faiz təşkil edib. Bu göstərici Ermənistanda son illərin ən yüksək seçici iştiraklarından biri hesab olunur.
