İyunun 15-nə keçən gecə Rusiya ordusu Ukraynaya qarşı növbəti kütləvi hava hücumu həyata keçirib. Raketlər və yüzlərlə pilotsuz uçuş aparatı ilə təşkil olunan zərbələr nəticəsində Kiyev, Kiyev vilayəti, Xarkov, Dnipro və Sumı şəhərlərində ciddi dağıntılar qeydə alınıb. Yaşayış binaları, mədəniyyət obyektləri, infrastruktur və tarixi abidələr zərər görüb.
Kiyev və Kiyev vilayəti ən ağır zərbələrdən birini aldı
Paytaxt Kiyevdə hücumun nəticələri şəhərin demək olar ki, bütün rayonlarında hiss olunub. Son məlumata görə, 4 nəfər həlak olub, 30 nəfər yaralanıb. Yaralananlar arasında hamilə qadın və iki azyaşlı uşaq da var.
Obolon rayonunda yaşayış binaları və anbarlar zədələnib, təxminən 30 avtomobil yanıb. Podol rayonunda fərdi ev və üçmərtəbəli tikili alovlanıb. Solomyansk rayonunda yaşayış məhəllələri və təhsil müəssisəsinin ərazisində yanğın baş verib. Peçersk rayonunda binalara ziyan dəyib, yataqxana yanıb. Dniprovski, Desnyanski, Holosiivski, Darnitski və Şevçenkivski rayonlarında da dağıntılar və yanğınlar qeydə alınıb.
Hücum nəticəsində elektrik xətləri zədələnib və paytaxtın şimal hissəsində təxminən 140 min abonent işıqsız qalıb.
Kiyevdə yerləşən Aleksandr Dovjenko adına Milli Kinostudiya da zərər görüb. Burada baş verən yanğın nəticəsində təxminən 100 min tarixi kostyum və milyonlarla geyim nümunəsinin saxlandığı fond təhlükə ilə üzləşib. “Mıstetski Arsenal” kompleksi, Ali Antikorrupsiya Məhkəməsinin binası və “Nova Poçta”nın ən böyük innovativ logistika terminalı da hücum zamanı zədələnib.
Rusiyanın zərbələri UNESCO irsi siyahısında olan Kiyev-Peçersk Lavrasına da dəyib. Uspenski kilsəsinin damında təxminən 800 kvadratmetrlik yanğın baş verib. Tarixi ikonalar, freskalar və interyer elementləri zədələnsə də, bir sıra qiymətli eksponatlar və dini relikviyalar xilas edilib.
Ukrayna Pravoslav Kilsəsinin rəhbəri Epifani hücumu “insanlığa, tarixə və xristianlığa qarşı növbəti cinayət” adlandırıb. Xarici işlər naziri Andriy Sibiha isə bu hücumu mədəni irsə qarşı vandalizm aktı kimi qiymətləndirib.
Kiyev vilayətində isə 3 nəfər xəsarət alıb. Onlardan biri 2011-ci il təvəllüdlü uşaqdır. Borispol, Brovarı, Vişqorod, Fastov və Buça rayonlarında yaşayış evləri, anbarlar və nəqliyyat vasitələri zədələnib.
Xarkov, Dnipro və Sumıda da itkilər qeydə alındı
Xarkov şəhəri raket və pilotsuz aparatlarla kombinə edilmiş hücuma məruz qalıb. Şəhərin Xolodnoqorsk və Şevçenkivsk rayonları hədəfə alınıb. İlk zərbə nəticəsində üç nəfər yaralanıb, onlardan ikisinin vəziyyətinin ağır olduğu bildirilir.
Daha sonra Rusiya qüvvələri yanğının söndürülməsi ilə məşğul olan xilasedicilərin olduğu əraziyə yenidən zərbə endirib. Nəticədə 5 xilasedici həlak olub, ən azı 5 nəfər isə yaralanıb.
Dnipro şəhərində sənaye müəssisələri, kollec, mədəniyyət obyektləri və infrastruktur elementləri zərər görüb. Şəhərin məşhur Orqan və Kamera Musiqisi Evi də dağıntılara məruz qalan obyektlər sırasında yer alıb. Hücum zamanı 64 yaşlı kişi yaralanaraq xəstəxanaya yerləşdirilib. Hava hücumundan müdafiə qüvvələri vilayət üzərində 24 pilotsuz uçuş aparatını vurub.
Sumıda iki pilotsuz aparat mülki obyektlərə düşüb. Dronlardan biri çoxmərtəbəli yaşayış binasına zərbə endirib. İlkin məlumata görə, üç nəfər, o cümlədən bir uşaq xəsarət alıb. Digər dron şəhərin mərkəzi hissəsində yerləşən qeyri-yaşayış binasını vurub. Bu ərazidə xəsarət alan olmayıb.
Ukrayna rəsmiləri hücumun nəticələrinin aradan qaldırılması istiqamətində işlərin davam etdiyini, dağıntıların miqyasının isə hələ dəqiqləşdirildiyini bildirirlər.
