Məşhur amerikalı aktrisa Sara Cessika Parker növbəti dəfə diqqət mərkəzinə düşüb. “Sex and the City” serialının ulduzu ABŞ-ın İllinoys ştatında yerləşən Şimal-Qərb Universitetinin məzuniyyət mərasimində iştirak edərək fəxri doktor dərəcəsi alıb və tədbirdə çıxış edib.
61 yaşlı sənətçi universitet tərəfindən incəsənət sahəsində fəxri doktor adına layiq görülüb. Parker mərasimə akademik mantiya ilə qatılıb və tədbirdən fotolarını sosial şəbəkə hesabında paylaşaraq “Hazıram və buradayam” sözlərini yazıb.
Mərasim zamanı çıxış edən aktrisa gənclərə öz fərdiliklərini qorumağın vacibliyindən danışıb. O bildirib ki, uğur qazanarkən insanın ən böyük üstünlüyü özünəməxsusluğunu itirməməsidir.
“Əgər bu günə qədər formalaşdırdığınız şəxsiyyəti qoruyub saxlaya bilsəniz, bu sizin ən böyük nailiyyətiniz olacaq. Arzular və ambisiyalar sizi fərqli istiqamətlərə aparsa da, unutmayın ki, bu yolu öz gücünüzlə keçmisiniz”, – deyə Parker vurğulayıb.
Aktrisanın sözlərinə görə, hər bir insan öz inkişaf sistemini qurur, həyatdakı çətinlikləri aşır və nəticədə daha güclü şəxsiyyət kimi formalaşır.
Sara Cessika Parker çıxışında ailəsinə də toxunub. O qeyd edib ki, oğlu Ceyms yaxın vaxtlarda kollec təhsilini başa vurub. Aktrisanın 17 yaşına yaxınlaşan əkiz qızları Marion və Tabita isə tezliklə ali təhsilə başlayacaqlar.
Tədbir zamanı Parkerin seçdiyi ağ krujevalı geyim və universitetin rəmzi rəngi olan bənövşəyi ayaqqabıları da diqqət çəkib. Sosial şəbəkələrdə onun yeni statusu və görünüşü izləyicilər tərəfindən böyük maraqla qarşılanıb.
Qeyd edək ki, Sara Cessika Parker uzun illərdir televiziya və kino sahəsindəki fəaliyyəti ilə tanınır və müasir populyar mədəniyyətin ən nüfuzlu simalarından biri hesab olunur.
